У вiцебскай “Ляльцы” ўзнагародзілі лепшых артыстаў мінулага творчага сезону

Уручэнне дыпломаў і памятных падарункаў лепшым артыстам адбываецца ў “Ляльцы” штогод. Вызначаюцца яны таемным галасаваннем, у якім удзельнічае ўся трупа. Па выніках 24-га сезона калегі найбольш высока ацанілі творчую працу трох артыстаў – Аляксандра Маханькова (стаў лепшым у намінацыі “Лепшая мужчынская роля” за ролю Аўтара ў спектаклі “Дэкамерон”), Вольгі Маханьковай (“Лепшая жаночая роля” за вобраз Нінэты ў “Дэкамероне”) і Валерыя Зімніцкага (“Дэбют сезона” за ролю Джавані ў “Дэкамероне”). Для Валерыя, выпускніка Беларускай дзяржаўнай акадэміі мастацтваў, 24-ты сезон быў першым у ягоным творчым жыцці.

Цырымонію ўзнагароджання правялі мастацкі кіраўнік тэатра, заслужаны дзеяч мастацтваў Беларусі Віктар Клімчук і загадчыца літаратурнай часткі Людміла Сіманёнак.

Усяго ў трупе “Лялькі” 16 артыстаў. Для двух з іх – Сяргея Талкача і Марыны Нікіцінай – сёлетні сезон стане дэбютным.