У Мінску адбыўся “Добры фэст”
І вядучыя, Іна Кашырына ды шырока вядомы ў вузкіх колах рэпер Вінсэнт, і выступоўцы ўвесь час заклікалі прысутных не быць абыякавымі да чужога болю, задумацца аб тым, што побач ёсць людзі, якія не маюць самых звычайных магчымасцяў – выйсці на вуліцу, сваёй рукой узяць цацку, самому скарыстацца лыжкай… І не проста задумацца, а паспрабаваць дапамагчы. Прысутных, дарэчы, было ня вельмі шмат, “Рэактар” быў запоўнены прыкладна на траціну. Магчыма, гэта было выклікана той самай абыякавасцю ды адсутнасцю цікавасці да музычнага жыцця Беларусі, а магчыма – недастаткова актыўнай рэкламай фэсту. 
Першымі выступалі музыкі гурта “Палац” з, як сказаў лідэр гурта Алег Хаменка, папсовай праграмай – бо дабрачыннасць – гэта ня толькі рокавая справа. Праўда, напрыканцы выступу Хаменка усё ж паабяцаў у наступны раз "адрокэнроліць". 
Пасля прызнання, што адзіным, чаго ён баяўся ў дзяцінстве, былі змеі, Вінсэнт быў вымушаны хуценька рэціравацца са сцэны, бо на яе выйшаў гурт “Змяя” (альбо, больш правільна - ZM99). Хаця, здаецца, вядомы рэпер паспяшаўся – назваць Зою Каральчук, салістку “Змяі” страшнай аніяк немагчыма. 
Трэцімі на сцэну падняліся хлопцы з гурта без назвы, таксама вядомага як :B:N:. І з першай песні ўпэўнілі гледачоў – “Жыве рок-н-рол!”.
Прыкладна ў сярэдзіне выступу да бярозаўскага гурта на адну песню далучыўся вядучы (хаця сам Вінсэнт заявіў, што ён тут упершыню за вечар, аб чым сведчыць новая майка). 
І вось на сцэне, напэўна, самы доўгачаканы (хаця і не апошні) гурт вечару – Neuro Dubel. Музыкі ня ў першы раз удзельнічаюць ў дабрачынных мерапрыемствах, ніколі не адмаўляючыся ад выступаў. Нажаль, не пра ўсіх можна сказаць тое ж самая. Як нявесела пажартаваў Аляксандр Кулінковіч, “па тэлебачанні кажуць, што мы, беларусы, такія добрыя і класныя, толькі гэтага ні разу не бачна.”
Выканаўшы дзесяць песень і сапраўды запаліўшы залю, “дзюбеля” сышлі, саступіўшы сцэну ініцыятарам і адным з арганізатараў мерапрыемства – гурту IQ48. 
Спадзяюся, што гэты фэст – не апошні дабрачынны канцэрт і што наступны пройдзе у “Мінск-Арэне” пры поўным аншлагу.
Больше фотографий смотрите на AFISHA.TUT.BY >>>