Барды Свабоды ў Менску
10.04.2010
—
Новости Культуры
У менскім Палацы мастацтва прайшла прэзэнтацыя мультымэдыйнага DVD-дыску “Барды Свабоды”. Гэта зборнік гутарак і песень 50-ці ўдзельнікаў аднайменнай перадачы Радыё Свабода, якія ідуць у эфіры зь верасьня 2008 году.
За амаль 2 гады прагучалі песьні блізу сотні бардаў. Аўтар перадачы – Зьміцер Бартосік.Гэта ўжо чацьверты мультымэдыйны дыск “Свабоды”. Першым быў аўдыёдыск “Быкаў на Свабодзе”, далей – два CD-дыскі “Начной чытанкі”.
Адметнасьць гэтага праекту ў тым, што гэта мультымэдыйны DVD-дыск “Барды Свабоды”, на якім, акрамя гутарак і песень 50-ці ўдзельнікаў аднайменнай перадачы, сабраныя PDF-вэрсіі ўсіх кніг з сэрыі “Бібліятэка Свабоды. XXI стагодзьдзе”.
Адкрывае дыск "Барды Свабоды" ўступнае слова дырэктара беларускай Свабоды Аляксандра Лукашука, які запісаў яго ў поўнай адпаведнасьці з законамі бардаўскага жанру.
На пачатку імпрэзы Зьміцер Бартосік зазначыў, што калі б яму некалі раней сказалі, што ў Беларусі можа быць пад дзьве сотні бардаў, і што столькі бардаўскіх песень могуць зьмясьціцца на адну кружэлку, ён ніколі б не паверыў.
На імпрэзе гітару ўзяў дырэктар беларускай службы Радыё Свабода Аляксандар Лукашук і заслужыў аплядысмэнты: ён прасьпяваў сапраўдную оду бардаўскай песьні.
