У Мытны ці ў Еўрапейскі?
Украіна «спынілася падумаць» пра тое, куды краiне ісці далей
Кабінет Міністраў Украіны падпісаў пастанову «Аб прыпыненні працэсу падрыхтоўкі да падпісання пагаднення аб Асацыяцыі з Еўрасаюзам».
Праціўнікі інтэграцыі з ЕС задаволены гэтым фактам, скептыкі — упэўнены, что краіна пачала дзялiцца на дзве часткі. Зараз шэрагу міністэрстваў даручана прапанаваць ЕС і Расіі стварыць камісію на трохбаковай аснове для выпрацоўкі комплексу пытанняў, накіраваных на аднаўленне страчаных аб’ёмаў вытворчасці, а таксама пашырэнне і садзейнічанне міжнароднаму гандлю. Акрамя таго, плануецца аднавіць актыўны дыялог з краінамі Мытнага саюза і СНД аб актывізацыі гандлёва-эканамічных сувязяў.
Нагадаем, пагадненне аб Асацыяцыі прадугледжвала збліжэнне ЕС з Украінай і адначасова фактычна пазбавіла б Украіну мыгчымасці ў далейшым далучыцца да Мытнага саюза з-за неадпаведнасці заканадаўчых нормаў. Па словах міністра па гандлю Еўразійскай эканамічнай камісіі (ЕЭК) Андрэя Сляпнёва, важна накіраваць намаганні на развіццё гандлёва-эканамічных адносін паміж краінамі Мытнага саюза і Украінай. Ва ўмовах глабальнага эканамічнага спаду гэта будзе выгадна ўсім бакам. Дарэчы, зусім нядаўна прэм’ер-міністр Украіны Мікалай Азараў адзначаў жаданне нарошчваць аб’ёмы тавараабароту з Беларуссю. Варта адзначыць, у мінулым годзе ён дасягнуў рэкордных $ 7,5 млрд. Прычым і беларускі, і ўкраінскі бакі рэальна ацэньваюць, што гэтую лічбу можна павялічыць у два разы. Нагадаем, Украіна ўжо мае статус назіральніка ў Мытным саюзе, але заяўку на ўступленне ў аб’яднанне, якое з 2015 года павінна трансфармавацца ў Еўразійскі эканамічны саюз, яна не падавала.
Прэзідэнт краіны Віктар Януковіч пакуль яшчэ не канчаткова адмовіўся ад пытанняў збліжэння з Еўропай, аб чым ён заявіў у Вене. Паводле яго слоў, шлях гэты для краіны няпросты, і чым далей — тым становiцца больш складаным. А віцэ-прэм’ер Украіны Юрый Бойка ўжо выказаў сваё меркаванне наконт пастановы кабміна: прымаючы такое рашэнне, урад карыстаўся выключна нацыянальнымі інтарэсамі, інтарэсамі захавання працоўных месцаў, павышэння эканамічнай стойкасці дзяржавы, вытворчага патэнцыялу і іншымі заданнямі, накіраванымі на забеспячэнне годных сацыяльных стандартаў жыцця ўкраінцаў.
Дарэчы, нядаўна была апублікавана справа¬здача Навукова-даследчага эканамічнага інстытута Мінэканамразвіцця Украіны аб тым, што пагадненне з Еўропай негатыўна адаб’ецца на многіх галінах эканомікі. У прыватнасці, эксперты падлічылі: бюджэт краіны недалічыцца 1,9 млрд. грывен паступленняў у першы год дзеяння зоны свабоднага гандлю з ЕC і 2,3 млрд. грывен — у другі. У першую чаргу гаворка ідзе аб паступленнях ад увазных пошлін, ад хімічнай і транспартнай галін, лясной гаспадаркі, здабычы вугалю, нафты, газу, металургіі, электра¬энергетыкі і машынабудавання. Так ці інакш, але склалася сітуацыя няпростага выбару. Многія партыі і палітыкі ўжо кажуць аб неабходнасці правядзення рэферэндуму па пытанні ўступлення Украіны ў адзін з саюзаў — у Мытны ці ў Еўрапейскі.