На Мадагаскары адбыўся ваенны пераварот

На Мадагаскары адбыўся ваенны пераварот пры ўдзеле палкоўніка Чарльза Андрыянасаавіны. Ён заявіў, што ўлада ў краіне належыць зараз не прэзідэнту Андры Ражуеліне, а яму і групе высокапастаўленых вайскоўцаў. Месцазнаходжанне былога прэзідэнта застаецца невядомым.

Пераварот адбыўся ў дзень рэферэндуму па пытанні змены канстытуцыі Мадагаскара, пра байкот якога абвясцілі ўсе апазіцыйныя партыі ў краіне.

Папраўкі дазволілі б прэзідэнту заставацца ва ўлады бестэрмінова.

Людзі, нягледзячы на пераварот, працягваюць галасаваць, бо многія жыхары краіны не ведаюць пра захоп улады. Мясцовыя сродкі масавай інфармацыі пра пераварот не паведамляюць.

Арганізатары перавароту заклікалі народ Мадагаскара да спакою і заявілі, што праца ўсіх дзяржаўных інстытутаў прыпыняецца. Кіраваць краінай будзе нацыянальны камітэт, яго склад яшчэ не абвешчаны. Ваенная хунта збіраецца вызваліць усіх палітычных зняволеных.

Прэзідэнт Андры Ражуеліна прыйшоў да ўлады на Мадагаскары ўвесну 2009 гады ў выніку дзяржаўнага перавароту. Прычынай перавароту тады стала жаданне папярэдняга лідара краіны ўсталяваць дыктатуру.