Нафтагіганты пакідаюць іранскі рынак

ЗША заявілі, што чатыры асноўныя міжнародныя нафтавыя кампаніі пагадзіліся згарнуць усе бізнэс-сувязі з Іранам, каб пазьбегчы амэрыканскіх санкцыяў. Гаворка ідзе пра францускую «Total», нарвэскую «Statоil», італьянскую ENI і галяндзкую «Royal Dutch Shell».

Намесьнік дзяржсакратара ЗША Джэймз Стэйнбэрг заявіў, што вядзецца расьсьледаваньне і адносна іншых міжнародных энэргетычных кампаніяў.

Раней у чацьвер Вашынгтон увёў фінансавыя санкцыі ў адносінах да іранскай кампаніі «Naftiran Intertrade», якая зьяўляецца швайцарскай філіяй нацыянальнай нафтавай кампаніі Ірану.