Расійскія супершпіёны і пасля 10 гадоў жыцця ў ЗША размаўлялі з моцным акцэнтам

Нью-ёркскі суд выдаў ордэр на дэпартацыю з ЗША 10 чалавек, арыштаваных па падазрэнні ў супрацоўніцтве з расійскай выведкай. Раней яны прызналіся ў незаконнай дзейнасці на карысць Расіі. У абмен на іх вызваленне Масква выпусціла 4 чалавек, абвінавачаных у шпіянажы на карысць Захаду.

Самалёт з 5 мужчынамі і 5 жанчынамі вылецеў з Нью-Ёрка праз некалькі гадзін пасля загаду суддзі аб дэпартацыі. Самалёт, верагодна, паляцеў у Вену.

Адвакат адной з агентаў, Вікі Пелаэс, кажа, што прадстаўнікі Расіі абяцалі ёй пажыццёвыя выплаты памерам у $2000, бясплатнае жыллё ў Расіі і пакрыццё ўсіх выдаткаў на наведванне дзяцей. Пелаэс, аднак, вырашыла вярнуцца ў роднае Перу. Перуанскі міністр замежных справаў Хасэ Антоніё Гарсія сказаў, што Пелаэс не чыніла ў яго краіне ніякіх злачынстваў і будзе «разглядацца як і любы іншы грамадзянін краіны».

Афіцыйна ўрад ЗША не абвінавачваў агентаў у шпіянажы. Яны былі абвінавачаныя ў незарэгістраванай дзейнасці ад імя замежнай дзяржавы, пры якім ім пагражала 5 гадоў пазбаўлення волі.

Усе дзесяцера перад судом у Нью-Ёрку прызналіся ў здзяйсненні злачынстваў. Нягледзячы на 10 гадоў жыцця ў ЗША, агучваючы «прызнанне віны», яны гаварылі з моцным расійскім акцэнтам. Гэты факт, як і малапрадуктыўная дзейнасць шпіёнаў на працягу дзесяцігоддзя — амерыканскія спецслужбы доўгія гады адсочвалі кожны іх крок — выклікаюць вялікія сумневы ва ўзроўні сучаснай расійскай разведкі.

Суддзя загадаў дэпартаваць усіх падсудных з патрабаваннем, каб яны забавязаліся не вяртацца ў ЗША без дазволу генеральнага пракурора.

У дзесяці расійскіх шпіёнаў канфіскаваная ўся маёмасць і грашовыя сродкі. У абмен на вызваленне дзесяці расійскіх агентаў Масква вызваліла чатырох чалавек, асуджаных на доўгія тэрміны зняволення за шпіянаж на карысць ЗША і Вялікабрытаніі. Гэта навуковец Ігар Суцягін, расійскі палкоўнік вайсковай выведкі Сяргей Скрыпаль, былы агент замежнай выведкі Расіі Аляксандр Запарожскі і былы афіцэр КДБ Анатоль Васіленка. Усе яны былі памілаваныя прэзідэнтам Мядзведзевым, але спачатку ім давялося прызнаць сваю віну. Reuters паведамляе, што некаторыя з расійскіх вязняў, якіх павінны абмяняць на агентаў, дэпартаваных з ЗША, цяжка хворыя.

wiadomosci.gazeta.pl