Барак Абама, прэзідэнт і мюзікл

На Барака Абаму, які перабыў на пасадзе прэзідэнта ЗША які год, усё сыплюцца і сыплюцца даброты: ён атрымаў Нобелеўскую прэмію міру, з дня яго нараджэння ў некаторых акругах штату Алабама зрабілі дзяржаўнае свята, і вось прыспела чарга мюзікла, зробленага паводле жыццяпісу першага чорнага прэзідэнта Амерыкі.
«Надзея! Музычны аповед пра Барака Абаму» -- гэтак называецца мюзікл, які пакажуць у Нямеччыны ўжо на наступным тыдні. Пастаноўкау прадставяць спярша ў Франкфурце. Яна раскажа пра 20 апошніх гадоў з жыцця Барака Абамы. Гісторыя распавядаецца з вуснаў шараговых чыкагцаў, якія з захапленнем назіраюць за чорнаскурым палітыкам, які прыносіць істотныя змены і новыя павевы спярша ў грамадскае жыццё Чыкага, а потым — і ўсёй Амерыкі.

У мюзікле прагучаць кампазіцыі ў стылі соўл, госпел, хіп-хоп і вядома, рокавыя напевы. У шмат якіх тэкстах песняў будуць выкарыстоўвацца слоганы з перадвыбарчай гонкі. Нават саму назву НОРЕ! («Надзея!») драматургі прыўласцілі са знакамітага, вытрыманага ў сіне-чырвонай палітры, перадвыбарчага плаката Абамы. Стваральнікі мюзыкла кажуць, што ў пастаноўцы прагучаць чуллівыя партыі Барака і ягонай жонкі Мішэль, а таксама дуэт паміж прэзідэнтам і дзяржсакратаркай Хілары Клінтан. Нават спаборнік Абамы на выбарах, Джон Маккейн разам са сваёй партнёркай Сарай Пэйлін, атрымалі сваё ўвасабленне ў пастаноўцы. Мюзікл — дзвюхмоўны: акторы будуць прамаўляць і спяваць па-ангельску і па-нямецку.

Але ж прадусары, відаць, моцна думаюць, ці варта шуму ўся аблава — і пакуль што прадаюць квіткі толькі на прэм'еру (кошт квітка ў Сеціве: 49-150 еўраў).

«Мы шмат рэпетуем, па 12 гадзін у дзень, але нам самім пакуль невядома, ці будзе пастаноўка мець працяг у выглядзе гастроляў, — сказаў у інтэрв'ю актор Джымі Уілсан, які ўвасабляе ў мюзікле амерыканскага прэзідэнта, — Так што пакуль чакаем прэм'еры, а там пабачым».

Чаму менавіта Нямеччына? У адрозненне ад саміх Штатаў, дзе папулярнасць Абамы, дзякуючы яго сціплым поспехам у справе давання рады эканамічнаму крызісу, за апошні час істотна знізілася, у ФРН абаманія па-ранейшаму ў моцы, на якую паўплываў пазалеташні палкі выступ Абамы перад 20 тысячамі немцаў у самым цэнтры Берліну, а таксама эфектнае з'яўленне яго падначаленай, Хілары Клінтан на святкаванні 20-годдзя падзення Берлінскага муру.