Літва зачыняе Ігналінскую АЭС

Літоўскія ўлады закрыюць за гадзіну да апоўначы 31 снежня атамную электрастанцыю ў Вісагінасе.

Ігналінская АЭС, пабудаваная 26 гадоў таму, з’яўляецца адзінай АЭС не толькі ў Літве, але і ва ўсіх трох былых балтыйскіх рэспубліках СССР.

Яе закрыццё было адной з умоваў уступлення Літвы ў Еўрасаюз.

Гэты крок, праўда, прывядзе да росту цэн на электраэнергію ў Літве, якая зараз перажывае цяжкі эканамічны перыяд, і рэзкі рост залежнасці краіны ад энергетычных паставак з Расіі.

Зараз Ігналінская АЭС задавальняе да 80% патрэб Літвы ў электраэнергіі.

Брусэль, які настойваў на закрыцці гэтай АЭС, выдаткаваў каля 820 млн еўра на пакрыццё часткі выдаткаў.

Крытыкі кажуць, што Ігналінская АЭС, якая была пабудавана па тым жа праекце, што і Чарнобыльская, магла б прапрацаваць яшчэ 10‑15 гадоў пры мінімальнай верагоднасці ўзнікнення якіх‑небудзь пазаштатных сітуацый.