На кіраўніцу «Граніта» Быструю склалі два пратаколы за адказы блогеру Случаку
На кіраўніцу «Граніта» Марыну Быструю склалі два пратаколы за адказы блогеру Ігару Случаку.
З ліста, атрыманага днямі з Лунінецкага райвыканкама, вынікае, што Быструю чакаюць яшчэ два адміністрацыйныя працэсы за адказ не па тэме звароту.
«У дачыненні да старшыні Савета Лунінецкага раённага грамадскага аб’яднання «Футбольны клуб «Граніт-Мікашэвічы» Марыны Быстрай за парушэнне заканадаўства аб зваротах грамадзян i юрыдычных асоб пачаты два адміністрацыйныя працэсы па арт. 9.13. КаАП Рэспублікі Беларусь.
Дадаткова паведамляем, што ў грамадскае аб’яднанне накіравана хадайніцтва аб прыцягненні старшыні Савета Лунінецкага раённага грамадскага аб’яднання «Футбольны клуб «Граніт-Мікашэвічы» Марыны Быстрай да дысцыплінарнай адказнасці за дапушчаныя парушэнні патрабаванняў актаў заканадаўства пры працы са зваротамі.
Разам з гэтым, адзначана неабходнасць прыняцця неадкладных мер па належнаму разгляду вашых зваротаў ад 7 чэрвеня 2017, 17 чэрвеня 2017, разгледзеўшы іх паўторна», — гаворыцца ў лісце за подпісам кіраўніка спраў Лунінецкага райвыканкама Аляксандра Грамыкі.
Адказнасць за парушэнне заканадаўства аб зваротах — штраф ад 4 да 10 базавых велічыняў.
Атрымаўшы ад Марыны Быстрай некалькі зняважлівых лістоў, Случак таксама звярнуўся са скаргай у Брэсцкі аблвыканкам і пракуратуру. Адказы яшчэ не прыйшлі.