БАТЭ абвясціў набор

Чэмпіён Беларусі папоўніўся бразільскім форвардам Майконам Каліжуры і армянскім паўабаронцам Завенам Бадаянам.

Як інфармуе афіцыйны сайт ФК БАТЭ, з польскага клуба "Ягелонія" (Беласток) падпісаны ў арэнду на паўгода бразільскі форвард Майкон Каліжуры з правам першачарговага выкупу. Майкон ужо знаёмы беларускім балельшчыкам і запомніўся высокай выніковасцю падчас выступленняў у "Гомелі", дзе ў сезонах 2008 і 2009 ён з'яўляўся партнёрам Рэнана Брэсана. Яшчэ адзін навабранец БАТЭ, паўабаронца Завен Бадаян выступаў за армянскі "Імпульс" з Дыліжана. Ён заключыў кантракт з БАТЭ тэрмінам на чатыры гады.

Нападаючы лонданскага "Чэлсі" і зборнай Іспаніі па футболе Фернанда Торэс можа пакінуць клуб.

Торэс быў набыты ў "Ліверпуля" за рэкордныя для Англіі 50 мільёнаў фунтаў стэрлінгаў па патрабаванні гаспадара каманды — расійскага мільярдэра Рамана Абрамовіча, але так і не прыжыўся ў асноўным складзе каманды. Зараз кіраўніцтва "Чэлсі" гатова прадаць самага дарагога футбаліста ў гісторыі прэм'ер-лігі любому клубу за 20 мільёнаў фунтаў. Нападаючы атрымлівае ў "Чэлсі" 150 тысяч фунтаў стэрлінгаў штотыдзень. З моманту прыходу ў лонданскую каманду — 31 студзеня 2011 года — Торэс забіў толькі тры мячы ў англійскай прэм'ер-лізе і два ў Лізе чэмпіёнаў. Як адзначае Еurоsроrt, у матчы 15-га тура чэмпіянату Англіі паміж "Чэлсі" і "Манчэстэр Сіці" на лаўцы запасных гульню пачалі футбалісты, на набыццё якіх клубы ў сукупнасці выдаткавалі астранамічную суму — чвэрць мільярда еўра.