Азаранка вярнулася ў тройку наймацнейшых

Вікторыя Азаранка, якая знялася з-за траўмы пляча з пекінскага турніру, нягледзячы на гэта, вяртаецца на трэцяе месца ў сусветным рэйтынгу. Вікторыя набрала 6190 ачкоў — і зараз зноў у тройцы наймацнейшых тэнісістак планеты (12 верасня яна таксама займала трэцюю прыступку, якую потым страціла). Узначальвае рэйтынг датчанка Каралін Вазняцкі (у яе недасягальныя 8005), на другім месцы расіянка Марыя Шарапава (6370).

У чарговым матчы чэмпіянату Кантынентальнай хакейнай лігі мінскае "Дынама" выйграла ў новакузнецкага "Металурга" — 3:0. Лік дынамаўцы адкрылі ўжо на 30-й секундзе паядынку, дзякуючы намаганням Збынека Іргла, а на 2-й хвіліне яго падвоіў Аляксандр Кулакоў. Пасля гэтага супернік змяніў варатара. Кропку ў матчы на 52-й хвіліне паставіў Цеему Лайнэ. Пасля гэтай перамогі "Дынама" з 21 ачком пасля 12 матчаў зноў заняло першае месца ў Заходняй канферэнцыі, прычым наша каманда таксама лідзіруе ў дывізіёне Тарасава. Хатнюю серыю сталічны клуб завершыць 12 кастрычніка паядынкам супраць "Астаны".

Алена КРАВЕЦ.