Ліга чэмпіёнаў: "Лінфілд" пройдзены

Трывожныя хваляванні наконт выніку хатняга матча чэмпіёна Беларусі 2-га кваліфікацыйнага раўнда Лігі чэмпіёнаў супраць "Лінфілда", дзякуй Богу, не спраўдзіліся: БАТЭ перамог суперніка з лікам 2:0. Галы ў другім тайме забівалі Павел Няхайчык і Аляксандр Паўлаў.

Першы тайм яскрава сведчыў пра тое, што нашы футбалісты вельмі хваляваліся за агульны вынік і свой апошні рубеж: гульня ў беларускага чэмпіёна былі даволі скаванай і не зусім удалай. Але ў другім тайме БАТЭ паказаў паўночнаірландцам, хто на полі гаспадар, а Няхайчык першым голам супакоіў і каманду, і балельшчыкаў. А другім мячом у вароты супернікаў Паўлаў замацаваў упэўненасць у станоўчым выніку. Цяпер БАТЭ ў трэцім раўндзе Лігі паедзе ў госці да літоўскага "Экранаса" з Паневежыса, які дома таксама перайграў мальтыйскую "Валету" — 1:0.

  Галоўны трэнер ФК БАТЭ Віктар Ганчарэнка на пасляматчавай прэс-канферэнцыі адзначыў, што прычынай нервознасці ў камандзе стала якасць гульні ў першым матчы, і вялікая колькасць фалоў была з той жа прычыны, але галы ўсё наладзілі. На асабістым сайце БАТЭ шчыра падзякаваў сваім балельшчыкам за стварэнне выдатнай футбольнай атмасферы і адзначыў, што пры такой яскравай падтрымцы ў каманды вырастаюць крылы за спінай, і яна пастараецца быць дастойнай гэтага.