Прэзідэнт ФІФА не дазволіў Брэсану ўжо сёлета гуляць за зборную Беларусі

Прэзідэнт ФІФА не дазволіў Брэсану ўжо сёлета гуляць за зборную Беларусі

Прэзідэнт ФІФА Ёзэф Блатэр не пагадзіўся рабіць выключэнне для Рэнана Брэсана і не дазволіў “новаму беларусу” гуляць за нашую зборную ўжо сёлета.

"Блатэр сказаў, што выключэнняў у футболе быць не можа, таму нам давядзецца пачакаць яшчэ год", - распавялі Еўрарадыё ў прэс-службе Беларускай федэрацыі футбола.

Нагадаем, Рэнан Брэсан у снежні 2010 года атрымаў беларускае грамадзянства. Аднак, згодна з правіламі міжнароднай федэрацыі, бразілец мусіць пражыць у Беларусі 5 гадоў, перш чым атрымае дазвол на выступы за нацыянальную зборную. Рэнан жа гуляе за нашыя клубы толькі 4 гады. Таму надзець майку зборнай Беларусі ён зможа не раней як у красавіку наступнага года.

Між тым трэнер “маладзёжкі” Георгій Кандрацьеў у інтэрв’ю “Камсамолцы” выказваў спадзяванні, што Брэсан зможа паехаць ужо на чэрвеньскі чэмпіянат Еўропы:

“Брэсан упрыгожыў бы нашую зборную - гулец вельмі талковы. Як трэнер я бачу яго ў камандзе. Але тут усё ўпіраецца ў тэрмін, які ён жыве ў краіне. Мы цяпер працуем у гэтым накірунку, каб ён атрымаў дазвол на выступ у зборнай ужо на чэмпіянаце Еўропы. Задзейнічаныя самыя сур’ёзныя сілы. Калі не атрымаецца, то будзем спадзявацца на тое, што выступім у фінале і заваюем пуцёўку на Алімпійскія гульні ў Лондан. Тады Брэсану ўжо нічога не зашкодзіць згуляць за Беларусь”.

22 студзеня ў Санкт-Пецярбургу кіраўнік нашай федэрацыі Генадзь Нявыглас сустрэўся з прэзідэнтам ФІФА Ёзэфам Блатэрам, дзе між іншым узняў пытанне Брэсана.

"Рашэнне Блатэра не стала для Генадзя Нявыгласа сюрпрызам, таму ён не засмуціўся", - адзначылі ў прэс-службе БФФ.

Блатэра можна зразумець: калі стварыць такі прэцэдэнт і "скасціць" год для Брэсана, у штаб-кватэру ФІФА пацягнуцца бясконцыя "хадакі" з аналагічнымі праблемамі. Найперш - з краінаў Блізкага Усходу, дзе практыка атрымання грамадзянства запатрабаванымі краінай футбалістамі вельмі распаўсюджаная.