Сталі вядомыя суперніцы Вікторыі Азаранка на чэмпіянаце WTA у Катары

У выніку лёсавання ўсе ўдзельніцы выніковага турніру года, што пройдзе ў сталіцы Катара горадзе Доха, былі падзеленыя на дзве групы.

У «бардовую» ўвайшлі Каралін Вазняцкі (Данія, 1), Франчэска Ск’явоне (Італія, 4), Саманта Стосур (Аўстралія, 5) і Алена Дзяменцьева (Расія, 7).

У «белай» выступяць Вера Званарова (Расія, 2), Кім Клійстэрс (Бельгія, 3), Елена Янкавіч (Сербія, 6) і Вікторыя Азаранка (Беларусь, 8).

Матчы групавога этапу пройдуць з 26 па 29 кастрычніка.

Паўфіналы запланаваныя на 30 кастрычніка, фінальны паядынак — на 31 кастрычніка.

Нагадаем, што Вікторыя Азаранка выйграла ў нядзелю тэнісны турнір Кубак Крамля.