Тэлеканал «Лад» сёння пакажа матч баскетбалістак Беларусі і Францыі

Баскетбалісткі зборнай Беларусі правядуць сёння першы матч 2-га этапа чэмпіянату свету ў Чэхіі.

У Остраве падапечныя Анатоля Буяльскага сустрэнуцца з французскімі баскетбалісткамі. Гульню, якая пачнецца а 19.00, беларускія аматары спорту змогуць убачыць у прамым эфіры тэлеканала «Лад». У гэтай жа групе Е сёння адбудуцца яшчэ два паядынкі: ЗША — Канада і Аўстралія — Грэцыя.

28 верасня зборная Беларусі згуляе з камандай ЗША, а 29 верасня нашы дзяўчаты сустрэнуцца з грэцкімі баскетбалісткамі.

Цяпер становішча ў кваліфікацыйнай групе Е такое: Аўстралія і ЗША — па 6 пунктаў, Беларусь і Францыя — па 4, Грэцыя і Канада — па 4.

Турнірнае становішча ў групе F: Іспанія і Расія — па 6, Чэхія і Паўднёвая Карэя — па 5, Бразілія і Японія — па 4.

У чвэрцьфінал выйдуць па 4 лепшыя дружыны з кожнай групы. Чвэрцьфінальныя паядынкі адбудуцца 1 кастрычніка, паўфіналы пройдуць 2 кастрычніка, а матчы за бронзу і золата — 3 кастрычніка.

Чэмпіён свету атрымае пуцёўку на Алімпіяду-2012 у Лондане.