Дар'я Домрачава заняла другое месца ў спрынце на этапе Кубка свету

Беларуская біятланістка Дар'я Домрачава заняла другое месца ў спрынтэрскай гонцы на восьмым этапе Кубка свету ў нарвежскім Халменколене.Дыстанцыю 7,5 км спартсменка пераадолела за 20 хвілін 47,3 секунды без промахаў на агнявых рубяжах. Домрачава на 4,9 секунды адстала ад немкі Зімонэ Хаўсвальд, якая таксама закрыла ўсе 10 мішэней.

Пятае месца заняла Людміла Калінчык (21.21,4; 0+0), 29-е — Надзея Скардзіна (22.26,3; 0+0), 47-е — Вольга Кудрашова (23.07,0; 0+1), 69-е — Ала Таўкач (24.02,2; 1+2). Вольга Назарава не стартавала.

На папярэднім этапе КС у фінскім Кантыялахці Домрачава двойчы была першай (у спрынце і гонцы пераследу). На Алімпіядзе ў Ванкуверы яна стала бронзавым прызёрам у індывідуальнай гонцы.

У другой палове дня ў Халменколене адбудзецца мужчынскі спрынт на 10 км з удзелам беларускіх біятланістаў Сяргея Новікава (№ 3), Рустама Валіуліна (№ 35), Аляксандра Сымана (№ 56), Міхаіла Сямёнава (№ 61) і Уладзіміра Чапеліна (№ 103).