6 лістапада жыхары Карэліцкага раёна далучыліся да ўнікальнага рэспубліканскага праекта “Дзеля славы агульнай Перамогі”, прымеркаванага да 75-годдзя Перамогі ў Вялікай Айчыннай вайне.
На Карэліччыне ў межах маштабнай акцыі на 35 воінскіх захаваннях часоў Вялікай Айчыннай вайны праходзяць цырымоніі забору зямлі з удзелам падрастаючага пакалення, прадстаўнікоў мясцовых улад, працоўных калектываў і пярвічных грамадскіх аб’яднанняў, а таксама духавенства і жыхароў населеных пунктаў. Кульмінацыяй падзеі стане мітынг на мемарыяльным комплексе “Зорка” у райцэнтры, куды з заборамі зямлі прыедуць экіпажы з усіх сельвыканкамаў. Далей капсулы з зямлёй з абласных гарадоў і раёнаў нашай краіны, у тым ліку Карэліцкага, 9 мая 2020 года ў дзень 75-годдзя Перамогі ў Вялікай Айчыннай вайне ўрачыста закладуць у крыпце Храма-Помніка ў гонар Усіх Святых у Мінску.
На брацкай магіле ў аграгарадку Турэц аддаць даніну памяці салдатам Перамогі прыйшлі і дарослыя, і дзеці. Важнасці падзеі ў звароце да прысутных падкрэсліў старшыня Турэцкага сельвыканкама Сяргей Барычэўскі, а настаяцель храма Пакрова Прасвятой Багародзіцы ў Турцы іерэй Андрэй Абрамовіч у малітве ўзгадаў загінулых герояў. Таксама ў памяць аб воінах запалілі лампадкі і ўсклалі да помніка кветкі. Пасля чаго адбыўся забор зямлі з брацкай магілы, якую сёння даставяць на мемарыял “Зорка”.
Імёны мужных салдат і іх бессмяротны подзвіг у чарговы раз успомнілі на брацкай магіле ў вёсцы Тударава. Старшыня Красненскага сельвыканкама Тамара Лейка падкрэсліла, што час ідзе, але слава народа Перамогі не гасне. Благачынны Карэліцкай акругі протаіерэй Мікалай Орса трапна заўважыў, што самы вялікі подзвіг — той, які ідзе ад самаахвярнага сэрца, ад пачуцця моцнай любові да бліжніх і да роднай зямлі. І гэтыя словы варта аднесці да загінулых, але вечна жывых у нашай памяці салдатаў той страшнай вайны. Іх след захоўвае і тудараўская зямля, горстка якой таксама будзе ў капсуле ад Карэліцкага раёна.
/Будзе дапоўнена/
Марына КАЗЛОВІЧ
Фота аўтара