Усе былі роўныя ў песнях славіць Ісуса Хрыста
Выступае хор прыходу Спаса-Праабражэнскага храма г. Смаргоні.
Згодна з умовамі фестывалю-конкурсу, у ім удзельнічаюць дзіцячыя і дарослыя, царкоўныя і свецкія харавыя калектывы, вакальныя ансамблі, у тым ліку і сольныя выканаўцы. Важна адзначыць, што свецкія калектывы прадастаўляюць праграму, якая адпавядае ідэалам высокамаральнага і духоўнага зместу.
Перад пачаткам канцэрта яго ўдзельнікаў прывітаў дабрачынны Смаргонскай акругі протаіерэй Анатоль Рэзановіч. Ён павіншаваў удзельнікаў фестывалю-конкурсу і гледачоў у зале з Калядамі і Хрышчэннем, благаславіў на добрую справу.
“Мы сабраліся тут для таго, каб праславіць у песнях Ісуса Хрыста. Рэгіянальны фестываль-конкурс “Слава ў вышніх Богу” традыцыйны, 14 па ліку”, - сказаў айцец Анатоль.
Канцэртную праграму адкрыў хор прыходу храма святых апосталаў Пятра і Паўла г. Астраўца. Потым выступілі некалькі спеўных калектываў нашага горада: хор прыходу Спаса-Праабражэнскага храма, ансамбль прыходу святога роўнаапостальнага князя Уладзіміра, ансамбль храма святых мучанікаў Антонія, Іана, Яўстафія Віленскіх, узорная дзіцячая вакальная студыя “ГаласОк” СШ №5 і іншыя. У фестывалі-конкурсе прынялі ўдзел і спеўныя калектывы з сельскай мясцовасці.
Са сцэны ў залу лілася гармонія гукаў, пранікала ў сэрцы людзей, якія прыйшлі паслухаць калядныя песнапенні. Здавалася, што напевы адныя і тыя ж, але гучалі яны па- рознаму. Калектывы і асобныя выканаўцы вызначаліся высокім узроўнем выканальніцкага майстэрства. І хаця гэта не проста фестываль, а яшчэ і конкурс, падчас якога неабходна ацэньваць выканаўцаў, але ўсе імкнуліся выступіць высокапрафесійна, таму не было лепшых. Усе былі роўныя ў сваім імкненні шчыра славіць у песнях Ісуса Хрыста.
Юрый ЯНУШКЕВІЧ.
Фота аўтара.