Аб выхаванні патрыятызму

Патрыятызм не ўзнікае па чыімсьці ўказанні ці распараджэнні, не з’яўляецца сам па сабе, на пустым месцы — яго патрэбна выхоўваць, карпатліва і пастаянна, дзень за днём, крок за крокам, з малых гадоў. І хто гэта зробіць лепш за ветэранаў вайны і працы, якія жыццём і справамі даказалі свой патрыятызм, праявілі яго ў дзеянні? Пра гэта і пра некаторае іншае ішла гаворка на пашыраным пасяджэнні прэзідыума раённага савета ветэранаў. Яно праходзіла 23 кастрычніка, а месцам правядзення была выбрана сярэдняя школа № 2. І зусім невыпадкова, што школа, бо тут вучаць дзяцей патрыятызму, прывіваюць любоў да Радзімы. І зусім невыпадкова, што школа № 2, бо якраз у гэтай установе шмат робіцца для таго, каб яе вучні мелі перад вачамі прыклады таго, як жыць, якімі быць і як адносіцца да месца, дзе жывеш, да школы, у якой вучышся. Сведчаннем таму стаў клас гісторыі школы, адкрыты з дапамогай і пры актыўнай падтрымцы былых вучняў (менавіта там і праходзіла пасяджэнне), галерэя эскізаў да ненапісаных карцін нашага народнага мастака Івана Булгакава, ён пэўны час працаваў у гэтай школе, а эскізы сюды перадаў яго сын Аляксандр Булгакаў. Пра ўсё гэта расказала ветэранам, правяла іх па школе яе дырэктар Алена Слічонак, таксама прапанавала цікавую прэзентацыю з фота- і відэаматэрыяламі, а школьнікі цудоўна і прачула выканалі верш пра Глушчыну і песню пра радзіму.