Падарункі першакласнікам

Першага верасня ў цэнтры ўвагі былі, несумненна, школьнікі. Іх віншавалі, ім жадалі поспехаў, настойлівасці, цярплівасці ў вучобе, да іх у класы прыходзілі дарослыя розных прафесій і з розных службаў.

Зараз праходзіць акцыя Міністэрства па надзвычайных сітуацыях “У цэнтры ўвагі — дзеці!”, і ва ўсіх школах раёна 1 верасня пабывалі прадстаўнікі раённага аддзела па надзвычайных сітуацыях. У сярэдняй школе № 1 старшы інспектар надзору і прафілактыкі РАНС Дзмітрый Клімовіч выступіў перад першакласнікамі і іх бацькамі, нагадаў ім пра тое, як важна выконваць правілы бяспекі. Малыя з радасцю адказвалі на пытанні госця, жадаючы паказаць, што яны ведаюць, як правільна сябе паводзіць, каб не нарабіць бяды. А каб гэтыя веды заставаліся трывалымі, кожны атрымаў у падарунак тэматычную кніжку-расфарбоўку.

З першакласнікамі дзвюх гарадскіх школ і гімназіі і іх бацькамі таксама сустрэліся прадстаўнікі Белгасстраха, расказалі аб актуальных відах страхавання маёмасці і здароўя непаўналетніх, падарылі каляровыя плакацікі-шаблоны для раскладу ўрокаў.

А. ПЯТРОВА

Фота Г. АЎТУХОВАЙ