Капаткевіцкая школа адзначана дыпломам

Дэлегацыя раёна ў мінулую суботу прыняла ўдзел у жнівеньскай нарадзе працаўнікоў адукацыі і навукі ў Гомелі. Пра гэта расказала начальнік аддзела адукацыі, спорту і турызму райвыканкама Святлана Сенька.У рабоце нарады прынялі ўдзел старшыні аблвыканкама і аблсавета дэпутатаў Уладзімір Дворнік і Кацярына Зенкевіч, а таксама намеснік міністра адукацыі Раіса Сідарэнка.

На нарадзе былі разгледжаны пытанні, якія тычацца павышэння кваліфікацыі педагогаў, выхаваўчай работы ва ўстановах адукацыі, прыцягнення навучэнцаў да ўдзелу ў грамадскіх аб’яднаннях,  атрымання школьнікамі рабочых спецыяльнасцяў.

Адным з блокаў было ўзнагароджванне прадстаўнікоў сістэмы адукацыі па выніках конкурсу на лепшую арганізацыю работы ў 2017—2018 навучальным годзе. Дарэчы, па выніках абласнога конкурсу сярод сярэдніх школ пераможцам стала Капаткевіцкая сярэдняя школа. Дырэктар установы Наталля Камнацкая была адзначана дыпломам і вымпелам.

Паведамляецца таксама, што ў нарадзе прынялі ўдзел петрыкаўскія танцавальныя калектывы “Аквамарын” і “Экшэн”,  фіналіст абласнога конкурсу “Лепшы класны кіраўнік – 2018”, настаўнік гімназіі г. Петрыкава Святлана Кавальчук.

П. ВАЛОДЗІН.