Наталіце смагу, хлебаробы

Райкам прафсаюза работнікаў АПК не толькі сочыць за паказчыкамі працаўнікоў, занятых зараз на жніве. Ён, у першую чаргу, клапоціцца пра стварэнне належных умоў працы і адпачынку хлебаробаў.

З гэтай прычыны ў аўторак старшыня галіновага прафсаюза Ірына Берднік наведала працаўнікоў жніва прама ў полі, пацікавілася ўмовамі працы, харчавання і забяспечанасцю спецвопраткай. Да таго ж, Ірына Генадзьеўна завітала да камбайнераў, механізатараў і вадзіцеляў не з пустымі рукамі. Кожны экіпаж, вадзіцель і трактарыст, наведаныя ў гэты дзень, атрымалі па бутлю вады, якая была прадастаўлена раённай арга-нізацыяй Беларускага таварыства Чырвонага Крыжа і якая так неабходная працаўнікам у гэтыя спякотныя дні.

У адказ жа хлебаробы падзякавалі за клопат пра іх і амаль усе са скрухай адзначылі, што сёлетняя ўборачная, бадай, адна са складаных за апошні час. Па-першае, шмат зерневых загінула на пачатку лета ад спёкі, а тое, што ўцалела, не даюць своечасова ўбраць дажджы. Таму і даводзіцца працаваць урыўкамі, паміж ападкамі.

Да таго ж збожжа паступае ў зернесушыльную гаспадарку пераўвільготненым. А яшчэ, як адзначылі камбайнеры Андрэй Рагалевіч з ААТ “Агра-Слабада”, Віталь Ваявода з КСУП “Чалюшчавічы” і Руслан Качэля з КСУП “Капаткевічы”, з-за шчодрай вільгаці на ніве інтэнсіўна пачало расці пустазелле. Гэта значна абцяжарвае работу камбайнаў і нават на пэўны час выводзіць іх са строю. Ураджайнасць на некаторых участках зусім нізкая, і як адзначыў Віталь Ваявода, даводзіцца абмалаціць амаль паўполя, каб набраць бункер.

Аднак, нягледзячы на гэтыя цяжкасці, хлопцы працуюць на сумленне, каб убраць уцалелае збожжа да апошняга каласка.

Дзмітрый БЯЛЬКО.

 Фота аўтара.