Першая вясновая навальніца ператварыла вуліцы Гродна ў бурныя рэкі

Залітая ўшчэнт Савецкая плошча і яе ваколіцы, затопленая кавярня Werden — такімі ўбачылі наступствы першай вясновай навальніцы ў Гродне карэспандэнты і чытачы гарадзенскага партала «Твой стыль».

Навальніца пачалася ў нядзелю, 17 красавіка, каля 17 гадзін.

Праз лічаныя хвіліны супрацоўнікі гастрабару Werden, што месціцца ў сутарэннях фабрыкі «Акцэнт», ужо прасілі сваіх кліентаў перайсці з адной залы, куды імкліва паступала вада з вуліцы, у другую.

Дапамагло ненадоўга — праз 10 хвілін усіх наведвальнікаў папрасілі пакінуць кавярню, бо вада працягвала прыбываць. Прыйшлося нават выклікаць МНС.

Тым часам людзі, якіх непагода заспела на вуліцы, скакалі праз бурныя патокі, спрабуючы схавацца ў крамах, кавярнях ды іншых публічных будынках, у брамах ці пад навесамі.

Фота: Руслан Кулевіч, Вітаўт Руднік / Твой Стыль