Песні-вяснянкі, рытуальны карагод ды традыцыйныя гульні: у Мінску на Чэрвеньскім рынку гукалі вясну

14 сакавіка на старэйшым рынку Мінска, Чэрвеньскім, успаміналі старажытны абрад гукання вясны. Зладзілі свята абуджэння прыроды ў сучасных гарадскіх умовах адміністрацыя рынка і "Студэнцкае этнаграфічнае таварыства".

Наведвальнікі і гандляры рынка акунуліся ў вясёлую атмасферу сапраўднага веснавога кірмаша і народнага гуляння, пачулі аўтэнтычныя песні-вяснянкі, якія славяць вясну як пару сонца, цяпла і кахання, танчылі ў рытуальным карагодзе пад беларускую дуду і гулялі ў традыцыйныя гульні беларусаў.