"Добры вечар таму, хто ў гэтым даму": у Строчыцах адгулялі Каляды

Яно вызначалася тым, што акрамя ўжо звыклых хрысціянскіх традыцый калядавання наведвальнікі маглі пабачыць і паўдзельнічаць у самых старажытных калядных дзеях: распальванне вогнішча, спаленне "Бедняка" і катанне вогненага кола.
 

Каляды праводзіліся з самых старажытных часоў, калі толькі фармаваўся славянскі этнас. Каляда – гэта назва маладога, зноў народжанага сонца. Па ўяўленню нашых продкаў менавіта 25-га снежня, у дзень зімовага сонцазвароту, старая зорка памірала, а новая нараджалася, і з гэтага дня пачынаўся новы аграрны год. Дзеля таго каб працэс нараджэння Каляды адбыўся без перашкод, праводзіліся абрадавыя дзеі, гэткія як: смерць і ажыўленне казы, распальванне вогнішча ў гонар зноў народжанага сонца ды іншыя. З прыняццем хрысціянства гэтае свята было прыстасавана да веры аб нараджэнні ў гэтыя дні Хрыста, што паўплывала на традыцыі святкавання.