Жыхары расійскай вёскі на беларускай мяжы: Мы не рускія і не беларускія

У Беларусь вяртаемся гэтай жа разбітай дарогай. На ёй ледзве не сутыкаемся з расійскай фурай, якая, нібы танк, сунецца з беларускага боку. Тыя ж выпаленыя палі і ацалелыя ад агню разрослыя хмызы. "Як уедзем у Беларусь - адразу адчуеце", - кажа кіроўца. На беларускім баку дарога дагледжаная. Першыя беларускія вёскі бязлюдныя. Радыяцыя - тлумачыць кіроўца. З набліжэннем да Краснаполля краявіды ажываюць. Людзей на вясковых вуліцах становіцца болей.