Падарунак ад акцёра. Віцебскія коласаўцы павіншавалі гараджан з Днём роднай мовы

Артысты, мастакі і супрацоўнікі літаратурнай часткі віцебскага Нацыянальнага акадэмічнага драматычнага тэатра імя Якуба Коласа правялі ў Міжнародны дзень роднай мовы вясёлую і крэатыўную акцыю.



На пачатку імпрэзы артысты сабраліся на прыступках свайго тэатра і выклалі з аркушаў паперы вершаваны дэвіз сваёй працы - спектаклі на Коласаўскай сцэне ідуць толькі па-беларуску.





Потым дарослым гараджанам яны дарылі сардэчкі з вершамі беларускіх паэтаў, а маленькім - чырвоныя паветраныя шарыкі. Праўда, дзеткам падарунак уручаўся не "за проста так" - малечы трэба было паказаць сваё веданне роднай мовы, назваць якія-небудзь беларускія словы. На жаль, мала хто з хлопчыкаў і дзяўчынак мог перакласці на нашу мову нават слова "спасибо". Дарослыя ж прыхільна ставіліся да акцыі.





У флэшмобе ўдзельнічалі артысты-коласаўцы Генадзь Гайдук, Анжаліка Баркоўская, Уладзімір Сівіцкі, Ірына Цішкевіч, Анастасія Чыстабаева і Антон Мінчык. Імпрэзу таксама падтрымалі вучні СШ № 21, студэнты Тэхналагічнага ўніверсітэта, аматары тэатральнага мастацтва.