Каб на вашым стале заўсёды быў духмяны хлеб... і да хлеба (рэцэпты)

На святочным стале павінны быць розныя стравы. Абавязкова каб быў свежы, духмяны хлеб і пабольш фруктаў, агародніны, зяленіва, якім упрыгожце практычна любую страву.

Ну, і, вядома, не абысціся без салатаў, халодных закусак, гарачых страў з бульбы і мяса, салодкіх пірагоў з яблыкамі, тварагом...

У наборы страў аддавайце перавагу здароваму харчаванню, і, думаю, усе, незалежна ад узросту, павінны кіравацца гэтым. Прапаную вам на выбар рэцэпты страў, якія прыгожыя на выгляд, смачныя і карысныя.

Салата “Радасць”

3 балгарскія перцы (чырвоны, жоўты, зялёны), 2 невялікія кабачкі, 2 невялікія баклажаны, 4 памідоры – сліўкі, 2 зубкі часнаку, 60 мл аліўкавага алею.

Перац і памідоры нарэжце на чацвярцінкі, кабачкі і баклажаны – па дыяганалі таўшчынёй ў 1 см.

Зрабіце заліўку: алей змяшайце з 2 зубкамі часнаку, які папярэдне прапусціце праз прэс, і паліце агародніну, добра перамяшайце. Няхай марынуецца.

Цяпер зрабіце запраўку для салаты, для чаго вам спатрэбіцца: 60 мл аліўкавага алею, 1 зубок часнаку, некалькі галінак свежай пятрушкі, 1 ст. лыжка цёмнага бальзамічнага воцату, шчопця цукру, чорны перац і соль – на смак.

Пятрушку дробна парэжце і змяшайце з дробна пасечаным часнаком, цукрам і бальзамічным воцатам, узбіце, дадайце алей і зноў добра ўзбіце. Урэшце дадайце чорны перац і соль.

На сухой патэльні абсмажце агародніну. Спярша кружкі кабачкоў і баклажанаў, затым перац і памідоры. Абсмажвайце з абодвух бакоў па пару хвілін.. Складзіце салату ў салатніцу, паліце запраўкай.

Навагодняя вітрына: тое, што вам трэба, можна знайсці, не ўстаючы з-за камп'ютара

Кугель

Такая страва з яўрэйскай кухні падыходзіць як да святочнага стала, так і для поснага, а таксама тым, хто аддаў перавагу вегетарыянству. Яе можна выкарыстоўваць як асобную страву, а можна і ў якасці гарніру – каму як падабаецца. Гэты рэцэпт нам прапанавала наша чытачка сайта Вольга, якая цяпер жыве далёка за межамі нашай краіны.

1 цыбуліна, 1 морква, палова качана капусты, пачка мяккага тварагу, лепш абястлушчанага, 1 яйцо, кроп ці пятрушка, шклянка проса, 60-80 мг алею, соль і спецыі – на смак.

Абсмажце цыбуліну на алеі, дадайце моркву, надзёртую на буйной тарцы, праз хвілінкі 2-3 – нашаткаваную тоненька капусту. Смажце яшчэ 10 хвілін.

Тварог узбіце ў блэндары з яйкам і дробненька нарэзаным кропам ці пятрушкай. Калі ён сухаваты, то дадайце трохі смятаны. Асобна зварыце проса.

Усе інгрэдыенты злучыце, добра перамяшайце, выкладзіце ў пасудзіну і запячыце ў духоўцы 35-40 хвілін пры тэмпературы 180 градусаў.

Смажаніна з індычкі

600 г грудкі індычкі (курыцы), 50 г бекона, 1 цыбуліна, 1 морквіна, 500 г шампіньёнаў, 1 зялёны яблык, 1 ст. лыжка мукі, 500 г бульбы, 5 ст. лыжак белага сухога віна, масла, алей.

Цыбулю і моркву абярыце і здрабніце. Грыбы вымыйце і нарэжце скрылікамі, сала – маленькімі кавалачкамі.

Разагрэйце на патэльні 2 ст. лыжкі алею, абсмажце цыбулю і моркву, 6-7 хвілін. Дадайце бекон і грыбы, яшчэ смажце, памешваючы 8 хвілін. Пасыпце агародніну і грыбы мукой, пасаліце і паперчыце. Уліце віно. Пастаянна памешваючы, давядзіце да кіпення і зніміце з агню.

Разрэжце філе індычкі ці курыцы на 4 кавалкі, натрыце соллю і перцам. У патэльні разагрэйце алей, абсмажце мяса (па 7 хвілін з кожнага боку). Перакладзіце на талерку.

Яблык вымыйце і нарэжце кружкамі. Пакладзіце на патэльню, дзе смажылася мяса, і абсмажце па 1,5 хвіліны з кожнага боку.

Бульбу абярыце, адварыце да гатоўнасці, зліце ваду, дадайце 1 ст. лыжку масла, яйцо, соль і стаўчыце на пюрэ.

Разагрэйце духоўку да 220 градусаў. Змажце бляху маслам. Выкладзіце кружочкі яблыка, растапіце трохі масла і папырскайце ім, пакладзіце на яблыкі абсмажанае філе індычкі (курыцы). Напоўніце бульбяным пюрэ кулінарны мяшок і прыгожа укладзіце яго вакол мяса. У сярэдзіну пакладзіце тушаную гародніну і грыбы.

Пастаўце бляху ў духоўку і запякайце 10-15 хвілін, пакуль пюрэ не набудзе чырванаватае адценне. Выкладзіце гатовую страву на папярэдне падагрэтыя талеркі. Упрыгожце зелянінай.

Кураняты з мандарынамі

4 кураняці, 8-10 мандарынаў, 350 мл белага віна, 2 галоўкі часнаку, цедра 1 апельсіна, 5 ст. лыжак аліўкавага алею, 3 ст. лыжкі масла, чабор (тимьян), соль, перац.

Куранят разрэжце на дзве палавінкі, пасаліце, паперчыце, абсмажце на аліўкавым алеі і масле разам з нячышчанымі долькамі часнаку. Пасыпце чабаром. Перакладзіце ў форму.

У масле абсмажце чацвярцінкі мандарынаў. Іх таксама пакладзіце ў форму. Накрыйце фальгой і пастаўце ў духоўку на 20 хвілін пры 160 градусах.

Віно разагрэйце ў каструльцы, дадайце туды цэдру і выпарвайце напалову. Уліце ў куранят і пастаўце ў духоўку яшчэ на 20 хвілін без фальгі.

Соус, што ўтварыўся, падавайце асобна.

Язык у мядова-гарчычным соусе з курагой

1 язык (папярэдне звараны з морквай, цыбуляй і спецыямі), 1-1,5 шклянкі белага сухога віна, 0,5 шклянкі вады, жменька курагі, 2 ст. лыжкі мёду, 2 ст. лыжкі французскай гарчыцы, 2 ст. лыжкі соевага соусу, аліўкавы алей, 2 зубкі часнаку.

Нарэжце звараны язык. У патэльні разагрэйце алей, абсмажце ў ім часнок, расціснуты плоскім бокам нажа. Уліце ваду, віно, дадайце курагу, гарчыцу, мёд і соевы соус. Трохі выпарыце без накрыўкі, каля 10 хвілін.

Дадайце язык, накрыйце накрыўкай і няхай патушыцца хвілін 20. Падаваць можна з адвараным белым рысам, з бульбяным пюрэ ці проста так.

Проста МАРЫЯ.

Фота static-hetzner.mediasaturnrussia.ru, hqoboi.com, s3.goodfon.ru.