“Забудова”: "Заробкі выплацілі, а скарачэнні не плануем"

У рэдакцыю “РГ” прыйшоў ліст ад работнікаў ААТ “Забудова” са скаргай на парушэнне працоўных дагавораў. Паводле ліста, 25 лістапада работнікам выплацілі толькі палову заробку, а не ўвесь. Людзі не ведалі, калі выплацяць астатнія грошы, а просьбы сустрэцца з кіраўніцтвам не задаволілі.

Яшчэ адна турбота калектыву − загад аб значным скарачэнні, які нібыта рыхтуюць. Яны тлумачаць, што з-за праблем з закупкамі сыравіны работы не хапае, а час прастою не аплачваецца.

На наш запыт ААТ “Забудова” адказала, што заробак выплацілі цалкам двума часткамі − 25 і 29 лістапада.

Затрымку патлумачылі штогадовым сезонным падзеннем попыту на будаўнічыя матэрыялы ў зімовы час і на знешнім, і на ўнутраным рынку. Яшчэ адна праблема − наяўнасць дэбіторскай запазычанасці.

Паводле адказу, скарачэнні рабочых месцаў не плануюцца. Планы вытворчасці на 2014 год прадугледжваюць загрузку магутнасцяў напоўніцу.

Прадпрыемства патлумачыла, што існуюць асобныя перабоі ў пастаўцы сыравіны і матэрыялаў, якія звязваюць з недахопам абаротных сродкаў, але іх вырашаюць у рабочым парадку.

Даведка “РГ”.Дэбіторская запазычанасць – сума пазык, якія павінны прадпрыемству іншыя прадпрыемствы за атрыманне паслуг ці куплю тавару.

Зоя ХРУЦКАЯ.

Фота 222.by