Жывёла ў кватэры. За што плацяць уладальнікі?
![](http://www.21.by/pub/news/2013/12/1386935763313167.jpg)
За ўтрыманне жывёл у кватэрах у домакіраўніцтве рэгулярна вылічваюць з уладальнікаў пэўныя сумы.Хацелася б ведаць, за якія паслугі?
З такім пытаннем звярнуўся да нас у рэдакцыю Аляксандр. У кватэры, гаворыць Аляксандр, усталяваныя лічыльнікі на электраэнергію, газ, ваду. За ацяпленне налічэнне робяцца па плошчы. Каналізацыяй і ліфтам жывёлы не карыстаюцца. Атрымоўваецца, колькасць пражываючых не іграе ролі. Пляцовак для выгулу ў горадзе няма. Прышчэпкі ад шаленства бясплатныя, гэта акцыя дзяржавы і фінансуецца з бюджэту. Астатнія прышчэпкі і лекі платныя. Так за што ж мы плацім?
Гэтае пытанне мы задалі вядучаму бухгалтару разлікова-касавага цэнтра горада Валожына Антаніне ЖУК.
− Мы дзейнічаем адпаведна загаду Мінскага аблвыканкама. Грошы, якія вылічваюць з уладальнікаў жывёлаў, паступаюць у раённы бюджэт. Падатак плацяць толькі ўладальнікі сабак. Для гаспадароў катоў ці іншых жывёлаў такі падатак не прадугледжаны. Памер падатку вылічваецца ў залежнасці ад памеру жывёлы і толькі з дасягнення жывёлай 3-месячнага ўзросту.
За маленькага сабачку вы заплаціце 6 500 рублёў, за сабачку сярэдняга памера 13 000, а за вялікага сабаку – 65 000 рублёў у месяц.
Падатак з уладальнікаў-пенсіянераў, інвалідаў першай і другой групы, адзінокіх грамадзян, ветэранаў не бярэцца. Таксама падатак не вылічваецца з тых, хто жыве ў сваім уласным доме.
У нас вядзецца сшытак, дзе запісаныя звесткі пра гаспадара і жывёлу. Гаспадар прыводзіць жывёлу ў домакіраўніцтва, мы замяраем вышыню карка сабакі, і запісваем гэтыя дадзеныя ў сшытак.
Грошы, што плацяць гаспадары, пойдуць на добраўпарадкаванне месцаў для выгулу сабак, ці на набыццё мікрачыпаў для хатніх жывёл.
Аднак, хачу адзначыць, што ў Валожыне такі падатак плацяць толькі 11 чалавек.
Падрабязную інфармацыі наконт рэгістрацыі жывёл можна атрымаць у інспекцыі па падатках і зборах па Маладзечанскаму раёну па тэлефонах: 770625, 772830, 777796
Наталля ТУР.
Фота dogvacay.com