Экспрэс-апытанне:Ці патрэбныя ў горадзе таксафоны?

Экспрэс-апытанне ў Маладзечне і Мядзеле

Вольга Хоміч, рэдактар сайта:

− Апошні раз карысталася тэлефонам-аўтаматам яшчэ ў школе, але гэта не значыць, што з вуліц іх трэба прыбраць. Раптам давядзецца міліцыю ці хуткую выклікаць, а мабільніка пад рукамі няма. Вось толькі таксафоны добра было б шумаізаляцыяй абсталяваць, а то калі і захочаш пагутарыць з кім, то наўрад ці пачуеш.

Марыя Кулік, школьніца:

− Таксафоны? Гэта такія сіненькія тэлефончыкі? Ніколі імі не карысталася. І не ведаю, для чаго яны патрэбныя!

Ніна Чарнакальская, перакладчыца:

− Сама я таксафонамі ніколі не карысталася. Але перыядычна бачу, як людзі ў горадзе размаўляюць па тэлефонах-аўтаматах. Значыць, некаму яны патрэбныя.

Анастасія Шыраева, супрацоўніца бібліятэкі, Мядзел

– Мяркую, што таксафоны ў горадзе патрэбныя. Розныя сітуацыя могуць быць: скажам, мабільны тэлефон  разрадзіцца. І ў гэты момант выручыць таксафон.

 Дзіна Гецьман, банкаўскі работнік, Мядзел:

– Лічу, што яны цяпер непатрэбныя. Таму што зараз ва ўсіх мабільныя тэлефоны ёсць – рэдка ў каго іх няма.

Анастасія Чараповіч, бібліятэкарка, Мядзел.

– Я таксафонамі не карыстаюся, але лічу, што яны патрэбныя. Бывае так, што мабільнага няма пад рукой – тады таксафон выручыць.

Падрыхтавалі Наталля ТУР, Алесь ВЫСОЦКІ.