Мядзельская дзесяціскласніца: "Тэлебачанне толькі нямецкае гляджу, кнігі ў арыгінале чытаю, у фэйсбуку, па скайпе па-нямецку кантактую"

Дзесяцікласніца гімназіі-інтэрната Мядзела Караліна Станчык тры гады запар становіцца прызёрам абласных алімпіяд па нямецкай мове.

А сёлета ёй пакарылася і рэспубліканская алімпіяда: напрыканцы сакавіка ў Мазыры яна заваявала Дыплом трэцяй ступені.

І гэта прытым, што нямецкую мову Караліна вывучае толькі на індывідуальных занятках, бо на ўроках у гімназіі авалодвае англійскай.

– Для  паспяховага выступлення на алімпіядах неабходныя выдатныя веды. А што яшчэ трэба, на твой погляд?

– Не трэба хвалявацца. Летась на рэспубліканскай алімпіядзе моцна хвалявалася. А калі хвалюешся, забываеш усё, нават самае простае. Сёлета сябе настройвала: нічога страшнага, калі не атрымаецца нешта заваяваць, не толькі перамога важная. Ёсць і іншыя плюсы, напрыклад,  знаёмства з новымі сябрамі, новым горадам, ацэнка сваіх ведаў. Паспрабавала не хвалявацца – удалося, нашмат лепшы вынік паказала. Яшчэ скажу, што калі ты не жыў ці не бываў у Германіі, на рэспубліцы шанцаў перамагчы няма. Там цэніцца размоўная мова, без акцэнту, усялякія выказванні, прыказкі, якія можна засвоіць у краіне мовы.

– Адкуль жа такая цікавасць да нямецкай мовы, цяпер усе англійскай захопленыя?

– Справа ў тым, што мая сям’я пэўны час жыла ў Германіі, я закончыла там пачатковую школу. Таму мне цікава вывучаць нямецкую мову, мне яна вельмі падабаецца.

Дапамагаюць Караліне ў вывучэнні прадмета настаўніцы Лідзія Анішкевіч, Вольга Нагела. У гэтым навучальным годзе гімназістка ездзіла на заняткі ў лінгвістычны ўніверсітэт. І сама стараецца мову ўдасканальваць:

– Тэлебачанне толькі нямецкае гляджу, кнігі ў арыгінале чытаю, у фэйсбуку, па скайпе з былымі аднакласнікамі па-нямецку кантактую.

Караліна пакрысе становіцца паліглотам: апроч вывучэння нямецкай і англійскай, яшчэ зацікавілася французскай мовай. Надта ж яна падабаецца, кажа.

Алесь ВЫСОЦКІ.

Фота sakha.gov.ru, Алеся ВЫСОЦКАГА.