Нядзельны кірмаш у Быхаве не адмяняецца нават падчас сапраўднай стыхіі

І гэта яскрава пацвердзілася ў мінулую нядзелю. Напярэдадні ўвечары і ноччу Быхаў не абмінуў не тое што першы снег — гэта быў вялікі снегапад, сапраўдная завея. А раніцай была ўжо плюсавая тэмпература — і ўсё, як кажуць, пацякло. Пляцоўка кірмашу апынулася ў вадзе і мокрым снезе. Яшчэ зацемна гандляры завозілі свой тавар, разграбаючы рыдлёўкамі для снегу наступствы стыхіі і гучна клянучы ненадзейнае беларускае надвор'е. Іх палохала, ці збярэ базар свой нядзельны натоўп, ці будзе выручка — гэта ж галоўны дзень у гандляроў. А для жыхароў горада і раёна прыйсці сюды, прыцаніцца, купіць альбо проста патаўкацца, паслухаць навіны — святое. Гэта ўжо даўняя быхаўская традыцыя, і нават старажылы не прыгадаюць, ці было калі, каб у нядзелю не гудзеў мясцовы кірмаш.

Ледзь пачало віднець, як на галоўную гандлёвую пляцоўку раёна пацяклі ручаінкі людзей. Вада і снег пад нагамі моцна хлюпалі, але пакупнікі гэтага не палохаліся. Самыя першыя, як правіла, прыязджаюць па парасят — гэты гандаль хуткацечны, толькі з гадзіну працягваецца, ад шостай да сёмай раніцы. Пазней месца жывёлаводаў займаюць мясцовыя фермеры з зернем, бульбай, крупамі і мукой.

Наступная хваля пакупнікоў — па мяса, вясковае малако і тварог. Нават з Магілёва едуць у Быхаў па свежаніну, бо гэты прадукт тут са свойскай жывёлы, якасны, смачны. А дванаццатай па поўдні мясныя прылаўкі пусцеюць. Распрадаецца і свежы хлеб, які прывозіць у Быхаў райпо з Клічава.

У гэтую восеньскую пару яшчэ працягваюцца кірмашы па продажы сельгаспрадукцыі з мясцовых СВК. Гандлююць з машын — капустаю і буракамі, цыбуляй. І парасятамі таксама. Хто не паспеў набыць "пятачка" ў цёмны час, купіць "калгаснага" гадаванца па 700 тысяч за лычык і не прагадае. Як не прагадаюць і ўсе тыя, хто не палохаецца прыроднай стыхіі і спяшаецца на спрадвечны покліч быхаўскага кірмашу.

 

Анатоль Кляшчук. Фота аўтара.