Ці складваецца ў вас уражанне, што ў горадзе няма інвалідаў?

Аляксей Чорны, студэнт:

– Так. Але думаю, яны ўсе сядзяць дома і не выходзяць на вуліцу. Сапраўды складваецца ўражанне, што Маладзечна – горад здаровых людзей. Але гэта не так, бо інваліды ёсць у кожным горадзе.
Аксана Ігнатовіч, прадаўшчыца:

– Я часам бачу інвалідаў на вуліцы. Умовы для іх ствараюцца, але вельмі марудна. Напрыклад, грамадскія прыбіральні непрыстасаваныя для іх. А калі б былі створаныя спецыяльныя таксі, яны маглі б больш свабодна рухацца па горадзе.
Марыя Юр’ева, кантралёр:

– Не думаю, што можа стварыцца такое ўражанне. Інваліды ў нас ёсць. Я бачыла невідушчых людзей, а таксама людзей на мыліцах. Калясачнікаў сустракаю радзей, але і яны ёсць.
Наталля Шчаблыкіна, пенсіянерка:

– Можна так і падумаць. Для інвалідаў нязручныя нашы тратуары, на якіх няма пандусаў. Нават калі рыхтавалі горад да “Дажынак”, нічога ў гэтым плане не змянілі. Калі маладым мамам цяжка з каляскамі, то інвалідам увогуле немагчыма.
Валянціна Чарняўская, прадпрымальніца:

– Думаю, інвалідам нязручна ў горадзе: няма пандусаў, спецыяльнага транспарту. Часам у іх нават няма магчымасці набыць каляскі. Калі звычайныя людзі атрымліваюць малыя пенсіі, што ж казаць пра інвалідаў?
Казімір Клімантовіч, рабочы:

– На маю думку, у нашым горадзе створаныя добрыя ўмовы для інвалідаў. Яны могуць атрымліваць дапамогу ў медыцынскіх установах. Існуюць таксама сацыяльныя работнікі, які некалькі разоў на тыдзень наведваюць іх.
Анатоль Сарока, рабочы:

– Я так не думаю. Інваліды на нашых вуліцах ёсць. Я бачу іх не часта. Можа, ім не вельмі камфортна ў горадзе. Але паступова ўмовы для іх ствараюцца.   

Настасся РОЎДА, Аляксандра ПАРАХНЯ.

Я стала невідушчай... на гадзіну (+відэа)