Свята працы і хлеба
Горкі вітаюць хлебаробаў
У горадзе Горкі Магілёўскай вобласці праходзіць рэспубліканскі фестываль-кірмаш працаўнікоў вёскі "Дажынкі-2012". Грандыёзнае свята разгарнулася на вуліцах абноўленага раённага цэнтра.
Уладары сяла
Пятнічнай раніцай сталіцу "Дажынак-2012" накрыла дажджавымі хмарамі. З неба ўпарта капала, але гэта нікому не сапсавала святочны настрой. Вуліцы горада хутка напоўніліся людзьмі, якія імкнуліся да новых уражанняў. І арганізатары горацкага фестывалю працаўнікоў сяла не падманулі іх чаканняў.
Першымі разганяць дажджлівы восеньскі настрой сталі на моладзевай пляцоўцы каля Палаца культуры Беларускай дзяржаўнай сельскагаспадарчай акадэміі. Там пачаўся рэспубліканскі этап сямейнага праекта "Уладар сяла", арганізатарам якога выступае БРСМ. На сцэне шэсць маладых сем'яў з розных рэгіёнаў Беларусі паказвалі, на што яны здатныя, спявалі на беларускай мове, дэманстравалі строі ў традыцыйным стылі. Маладыя людзі расказвалі пра сваю працу на зямлі і пра тое, што азначае дружная сям'я для жыцця і шчасця.
Журы і балельшчыкі "Уладара сяла" з нецярплівасцю чакалі, каб ацаніць майстэрства колкі і ўкладкі дроў у конкурсе "Дрывасек"; жанчыны павінны былі спраўляцца з конямі, а мужчынам загадалі сякерай(!) зрабіць з кавалка бервяна кухонную дошку. Карацей, сумна ўдзельнікам і гледачам не было.
Між тым навокал ажыўляліся сельскія падворкі. Спажывецкая кааперацыя Магілёўскага раёна частавала народ яечняй са шкваркамі і блінцамі прама з патэльняў, а таксама салёнымі апенькамі, хрумсткімі агуркамі і журавінамі на дэсерт. На "Мсціслаўскім падворку" зрабілі націск на рыцарскую тэматыку: на пярэдні план выставілі гордыя постаці воінаў сярэднявечча для фотаздымкаў, а ў глыбіні двара жанчыны круцілі на пажогу тушу барана, прапаноўваючы гасцям ежу для сапраўдных мужчын.
Кожны падворак дэманстраваў сваю арыгінальную "фішку". У Бялыніцкім раёне гарманіст іграў каля плюшавай рабой каровы (<І>фота за грошы ).
— Дождж не перашкаджае святу! — сцвярджала, запрашаючы на падворак, гаспадыня Вера. — Бо яно ў нашай душы, і нам весела і добра.
Моцна ўразіла "Свята хлеба". Бабруйскія кандытары на вачах здзіўленай публікі карпелі над 30-метровым тортам з выглядзе цягніка з вагонамі і сімволікай "Дажынак". А побач свае неверагодныя вырабы дэманстраваў "Магілёўхлеб- прам": боханы і батоны, зробленыя ў дзесяць разоў большымі за звычайныя, прызначаны для памятных фотаздымкаў. Вафельны млын, печка з пячэння, гарбузы і кабачкі з салёнага цеста. Усё можна есці, але не хочацца — вельмі прыгожа. Самы галоўны торт важыць больш за 300 кілаграмаў, яго рабілі тры дні, і ён упрыгожаны картамі ўсіх абласцей Беларусі, лічбамі намалоту збожжа і прыгожымі каласамі.
Кіраўскі раён вылучыўся незвычайным беларускім флагам: яго зрабілі з ягад каліны, вінаграду і фасолі. З такіх простых рэчаў атрымалася сапраўдная прыгажосць. На "Магілёўскім гасцінцы" знайшлася экспазіцыя з "гламурнымі" хлебаробамі: манекены (відаць, з модных крам) у народных строях пасярод жыта і сланечнікаў. Цікаўных людзей з фотаапаратамі навокал хапала.
Горад пад дажджом
Горад уражвае сваёй еўрапейскасцю. Прыгожыя фасады, стылёвыя лініі, прыемныя воку фарбы. Усе ў адзін голас сцвярджаюць, што раённы цэнтр проста не пазнаць.
Прыемна, што абнаўленні датычацца не толькі будынкаў: у Горках з'явіліся цікавыя скульптуры. На "Дажынках" адбылося афіцыйнае адкрыццё скульптуры "Вечная студэнцкая вясна". Пара чытала кнігу пад дажджом, яе акружалі студэнты з парасонамі. Проста немагчыма не ўсміхнуцца на надпіс "Я цябе кахаю" і сардэчка, нібыта выразаныя на лаўцы. А народу найбольш даспадобы прыйшоўся бутэрброд з відавочна доктарскай каўбасой і галодным верабейкам побач.
Размах свята — проста неверагодны. Па горацкіх пагорках (прабачце за таўталогію) рухаецца паток людзей з парасонамі. Маладыя людзі з дзецьмі і каляскамі, нетаропкія пенсіянеры, шмат народу ў сцэнічных касцюмах і традыцыйных строях. Кавярняў і крам навокал столькі, што проста вочы разбягаюцца: тут можна набыць усё — ад зімовых паліто да якога-небудзь мясцовага народнага прысмаку.
На вуліцы Студэнцкай прагульваюцца маладыя людзі ў класічных строях. Марыя і Іван, студэнты Магілёўскага каледжа мастацтваў, не скардзіліся на вільгаць і халодны вецер, а загадзя надзелі пад смокінг і тонкую бальную сукенку цёплыя світары, узброіліся вялікімі парасонамі і радавалі ўсмешкамі мінакоў, якія бясконца фатаграфаваліся з прыгожымі парамі.
— Я ўжо бываў на "Дажынках", і мне здаецца, што з кожным разам усё лепей і лепей! — сказаў Іван.
Яўгенія і Канстанцін Пятрушы — госці "Дажынак" з Бабруйска. У складзе казацкага ансамбля "Вольніца" яны выступаюць на канцэртнай пляцоўцы і радуюцца, што публіка прымае іх з захапленнем.
— Нам падабаюцца "Дажынкі" сваёй масавасцю, народнымі традыцыямі, — гаворыць статны мужчына ў казацкім мундзіры.
— Так добра навокал спяваюць, што плечы самі падскокваюць! — усміхаецца яго жонка. — Зычым людзям паболей хлеба, здароўя, і каб наша сінявокая і зялёная Беларусь квітнела і радавалася!
Усмешкі пераможцам
Маладыя магілёўскія спявачкі Віялета, Дар'я і Ангеліна нібыта не заўважаюць дажджу. Дзяўчаты прытанцоўваюць каля эстраднай пляцоўкі і расказваюць, што Горкі змянілі аблічча.
— Такі яркі і чысты горад! І на "Дажынках" нам цікава, тут вясёлая атмасфера, — усміхаюцца маладыя магіляўчанкі. — Мы чакаем шэсця хлебаробаў: яны сапраўдныя мужчыны, моцныя, надзейныя, працалюбівыя, працуюць на карысць грамадства і, напэўна, нядрэнна зарабляюць!
— Нашы Горкі змяніліся, несумненна, у лепшы бок! — лічыць студэнтка Юлія Арцюхоўская. — Будзем спадзявацца, што і надвор'е бліжэйшым часам зменіцца гэтак жа сама!
На Цэнтральнай плошчы Горак найбольш шматлюдна. Пакуль артысты рыхтаваліся да галоўнага выступлення, госці з рэгіёнаў спявалі і танчылі на падворках. "Асіповіцкі барок" арганізаваў карагод з... "баравіком" і дзяўчынкамі, а суправаджаў іх ансамбль, дзе саліравала... сапраўдная піла!
— Гэта цудоўнае свята, якое нясе шмат шчасця і радасці людзям, — сказаў Анатоль Аляксеевіч Пятраеў з пасёлка Ялізава Асіповіцкага раёна. — Трэба ж не толькі працаваць, але і святкаваць! І нам не перашкодзіць надвор'е, таму што ў нас бадзёры настрой. Галоўнае — усміхацца! Усім любові і шчасця!
У адным месцы — "Яблыневы сад", побач — "Свята цыбулі і часнаку". На падворку Чавускага раёна Валянціна Маўчан настойліва прапаноўвала ўжываць цыбулю і часнок, каб не толькі не захварэць, але і не зважаць на дождж і хмары.
— Будзе ў нас яшчэ сонейка! — абяцала вясёлая жанчына.
Фестываль працягваецца
На Цэнтральнай плошчы ўдзень разгарнулася тэатралізаваная дзея "У гонар зямлі беларускай". Публіка засталася ў захапленні ад выступлення зводнага духовага аркестра, песень і танцаў артыстаў. Тут жа адбылася цырымонія адкрыцця памятнага знака "Сімвал дабрабыту зямлі Горацкай".
Адсюль стартавала шэсце ўдзельнікаў фестывалю-кірмашу "Дажынкі-2012". Працаўнікі сяла прайшлі па святочных вуліцах Горак. Па шляху на канцэртных пляцоўках шэсце віталі артысты і шчырая публіка.
Калона дайшла да моладзевага культурна-забаўляльнага цэнтра з амфітэатрам, дзе і адбылася асноўная дзея "Дажынак": урачыстае адкрыццё фестывалю-кірмашу і цырымонія ўручэння першых прэмій пераможцам рэспубліканскага спаборніцтва па ўборцы збожжавых культур, а таксама дзяржаўных узнагарод.
Увечары ў амфітэатры прайшоў канцэрт народнага артыста Расіі Алега Газманава, а потым над гладдзю Ніжняга возера рассыпаўся яркімі агнямі святочны феерверк.
Сёння ў Горках працягваюцца "Дажынкі-2012". Фестывальная праграма вельмі насычаная. Аб 11-й гадзіне ў амфітэатры пачынаецца цырымонія ўручэння дзяржаўных узнагарод, другіх і трэціх прэмій пераможцам спаборніцтва, і яна праходзіць у суправаджэнні творчых калектываў розных абласцей краіны. Затым адбудзецца моладзевы эстрадны канцэрт. Найбольш разрэкламаванае арганізатарамі суботняе мерапрыемства — "Свята піва". Гільдыя півавараў Беларусі і буйныя броварныя кампаніі прадстаўляюць сваю лепшую прадукцыю, іх падтрымліваюць сваімі жывымі выступленнямі беларускія рок-музыканты.
Працуюць шматлікія выставы, кавярні, гандлёвыя рады. Іх дэвіз — да апошняга кліента. Горкі гуляюць, "Дажынкі" ідуць!
Ілона Іванова. Фота Марыны БЕГУНКОВАЙ.
г. Горкі.