Алесь Пушкін збірае валанцёраў для рэстаўрацыі царквы св. Міхаіла ў Сынкавічах

Царква св. Міхаіла - гатычны праваслаўны храм, збудаваны ў XV стагоддзі. Гэта, бадай, адзін з найцікавейшых архітэктурных помнікаў у Беларусі. 

 Як піша на сваёй старонцы ў Facebook Віктар Марціновіч, якому патэлефанаваў Алесь Пушкін і папрасіў дапамагчы, «у 90-х нейкія прыкалісты разфарбавалі яе знутры алеяй - наўпрост па сценах». І цяпер Алесь Пушкін збірае брыгаду валанцёраў, згодных папрацаваць на рэстаўрацыі храма. Рэстаўратараў-аматараў плануецца размясціць па хатах у мясцовых.

Віктар Марціновіч заўважае, што патэбныя выключна хлопцы. Гэты пункт прапановы выклікаў цікавасць і нават абурэнне некаторых чытачоў. Сёй-той выказаў меркаванне, што адных хлопцаў запрашаюць таму, каб дзяўчаткі «ад боскае справы не адрывалі». Адна дзяўчына сказала, што гэта, маўляў, «троху смешна». Ей гэта нагадала выпадак, калі да яе прыйшла суседка па лецішчы і папрасіла выратаваць ад голаду. Тая запыталася: «Што ж вам даць?» А суседка заяўляе: «Толькі твае мясістыя ўкраінскія памідоры могуць наталіць мой голад, толькі яны».

Зрэшты, хутчэй за ўсё, рэстаўратарам давядзецца працаваць у алтары. Куда, згодна з правіламі праваслаўнай царквы, дзяўчынам уваходзіць нельга. 

Валанцёрам абяцаюць сякія-такія грошы за працу (80 тыс. за апрацаваны метр сцяны).

Калі вас зацікавіла гэтая прапанова, тэлефануйце Алесю Пушкіну: 8-029-606-82-06 (Velcom).