Андрэя Пачобута адпусцілі пад падпіску аб нявыездзе

"Да мяне прыйшлі ў камеру і сказалі збіраць рэчы, бо пераводзяць у іншую камеру. Але пасля мяне проста вывелі за браму турмы", — паведаміў "Свабодзе" Андрэй Пачобут.

Андрэя Пачобута арыштавалі 21 чэрвеня. Супраць яго завялі крымінальную справу і вінавацяць паводле крымінальнага артыкула 367, частка 2 — "Паклёп у адносінах да прэзідэнта, які ўтрымліваецца ў публічным выступе, альбо ў друкаваным ці публічна дэманстраваным творы, альбо ў СМІ, учынены асобай, якая раней была асуджана за паклёп альбо знявагу".

Паводле Крымінальнага кодэксу, журналіста могуць пакараць абмежаваннем волі на тэрмін да 5 гадоў альбо пазбаўленнем волі на такі ж тэрмін. Пачобут адмовіўся супрацоўнічаць са следствам. Заўтра, 1 ліпеня, скончыцца 10-дзённы тэрмін яго затрымання, і яму мусяць прад’явіць абвінавачанне да гэтага часу.