Пратакол, складзены на гродзенскага святара, суд вярнуў на дапрацоўку

Справу сьвятара Мікалая Гайдука, якога вінавацілі ў непадпарадкаваньні службовым асобам за тое, што адмовіўся здаваць адбіткі пальцаў, суд Ленінскага раёну Горадні прыпыніў і вынес рашэньне адправіць пратакол на дапрацоўку.

Судзьдзя Ксенія Стасюкевіч у сваім рашэнні спаслалася на тое, што ў пратаколе міліцыянтаў ня быў зафіксаваны час здзяйсьненьня правапарушэння, а таксама на тое, што пратакол, які міліцыянты даслалі на хатні адрас Мікалая Гайдука для азнаямлення, быў высланы звычайным лістом, і таму не было пацвярджэння, што святар з ім азнаёміўся.

Нагадаю, што святар Мікалай Гайдук быў адпачатку ня згодны з пратаколам, які склаў на яго ўчастковы інспэктар. Ён сцвярджаў, што пратакол быў складзены завочна, безь ягонай прысутнасці і з відавочнымі парушэннямі заканадаўства. У прыватнасці, у пратаколе ўчастковы запісаў, што святар адмовіўся падпісваць яго, хоць пратакол складаўся без удзелу святара.

Паводле святара, ён нават ні разу не сустракаўся з участковым інспэктарам. Той тэлефанаваў і запрашаў на дактыласкапію, але Мікалай Гайдук адказваў яму, што мусіць параіцца са сваім кіраўніцтвам. Міліцыянт склаў пратакол завочна.