Падчас візіту Пуціна ў аддзялленні банка на Маркса шукалі выбухоўку

Каля 11-й гадзіны у аддзяленні Беларусбанка па адрасе Карла Маркса, 8 супрацоўнікі заўважылі новую валізку без гаспадара. Яны адразу ж выклікалі міліцыю, якая ў сваю чаргу вырашыла звярнуцца па дапамогу сапёраў.

Ужо ў 11.20 участак вуліцы быў цалкам ачэплены - міліцыянты і людзі ў цывільным не прапускалі пешаходаў і транспарт, а таксама вывелі з установаў, кавярняў і крамаў усіх супрацоўнікаў і наведнікаў.

Еўрарадыё ўдалося паразмаўляць з супрацоўніцай банку, якая прысутнічала там у момант знаходжання валізкі. Жанчына расказала, што яе пакінуў мужчына, які спачатку паставіў валізку ля касы, пазней паставіў яе ля сцяны і сышоў.

Пасля кароткага абследавання валізкі сапёры вынеслі яе з памяшкання банку і падарвалі. У ёй, акрамя папер і дакументаў, нічога не аказалася.