ХРОНІКА АПОШНІХ ПАДЗЕЙ

Мядзведзеў узначаліў "Адзіную Расію"

Прэм'ер-міністр Дзмітрый Мядзведзеў абраны старшынёй "Адзінай Расіі", яго кандыдатуру падтрымаў ХІІІ з'езд партыі. Абранне новага старшыні стала галоўным пытаннем з'езда "АР". З 2008 года партыяй кіраваў Уладзімір Пуцін, які таксама займаў пасаду прэм'ер-міністра.

Новы кіраўнік партыі выступіў з шэрагам прапаноў адносна будучыні "Адзінай Расіі". У прыватнасці, ён прапанаваў абіраць на альтэрнатыўнай аснове сакратароў партарганізацый усіх узроўняў, кіраўнікоў фракцый, партыйных кандыдатаў у губернатары і мэры, а таксама кандыдатаў на пасаду спікера Дзярждумы. Акрамя таго, Дзмітрый Мядзведзеў выступіў за ўвядзенне адзінага пяцігадовага тэрміну паўнамоцтваў для ўсіх органаў партыі і за рэгулярную ратацыю іх складу.

Цэнтрабанк Швейцарыі пачаў рыхтавацца да распаду еўразоны

Нацыянальны банк Швейцарыі ўсталюе кантроль за рухам капіталу ў краіне ў рамках падрыхтоўкі да распаду еўразоны. Пра гэта кіраўнік банка Томас Ёрдан заявіў у інтэрв'ю газеце "Sоnntаgszеіtung". Як удакладніў старшыня ЦБ, асабіста ён не думае, што еўразона разваліцца, але банк вымушаны прыняць папераджальныя меры. Ёрдан паведаміў, што ў НБ з'явіцца рабочая група, якая будзе змагацца з празмерным умацаваннем швейцарскага франка. Нацыянальны банк Швейцарыі змагаўся з умацаваннем франка і ў мінулым годзе. Швейцарская валюта пачала даражэць да шматгадовых максімумаў на фоне пагаршэння эканамічнай сітуацыі ў Еўропе і ЗША. Інвестары разглядаюць франк як "ціхую гавань" — гэта значыць, актыў, менш адчувальны да змен рынкавай кан'юнктуры, чым традыцыйныя валюты.

Добры характар дазваляе пражыць даўжэй за іншых

Людзі, якія жывуць да ста гадоў і больш, ад прыроды радасныя і ў цэлым пазітыўна глядзяць на жыццё, вынікае з даследавання амерыканскіх спецыялістаў. Як паведамляе Skу Nеws, выснова апынулася нечаканай: добры характар можа быць часткова абумоўлены генамі. Праведзены аналіз быў часткай праекта "Гены даўгалецця". Тэсты паказалі: група людзей, чый сярэдні ўзрост складаў 97,6 года, мелі больш нізкія ацэнкі па шкале "неўратычнай асобы", чым у рэпрэзентатыўнай выбарцы насельніцтва. Плюс, у гэтых людзей адзначаліся высокія паказчыкі адказнасці. На думку спецыялістаў, характар і працягласць жыцця звязаныя адно з адным.

Украіна падлічыла прыбытак ад Еўра-2012

Мінімальная выручка Украіны ад турызму падчас правядзення чэмпіянату Еўропы па футболе складзе 1,3-1,5 мільярда долараў. Пра гэта віцэ-прэм'ер і міністр інфраструктуры краіны Барыс Калеснікаў распавёў у інтэрв'ю газеце "Камерсант-Украіна". Паводле яго слоў, чакаецца, што Украіну падчас Еўра-2012 наведаюць ад 800 тысяч да 1,2  мільёна турыстаў.

У пачатку красавіка некаторыя аналітыкі прагназавалі больш сціплыя паказчыкі: на іх думку, даход Украіны ад Еўра-2012 складзе толькі 300-500 мільёнаў долараў. Усяго выдаткі ўкраінскага боку на падрыхтоўку да турніру склалі пяць мільярдаў долараў. У першую чаргу яны пайшлі на будаўніцтва аэрапортаў, дарог, падрыхтоўку транспартнай інфраструктуры. Калеснікаў адзначыў, што Польшча, са свайго боку, выдаткавала на падрыхтоўкі да Еўра-2012 34 млрд. долараў.

Коратка

Беларусь у студзені-красавіку 2012 года пералічыла ў бюджэт Расіі $1472,6 млн вывазных мытных пошлін на нафтапрадукты, атрыманыя з расійскай нафты.

У Беларусі за студзень-красавік гэтага года зарэгістравана больш за 17,6 тыс. шлюбаў, паведамілі ў Нацыянальным статыстычным камітэце. На 1000 жыхароў рэспублікі прыпадала 5,6 шлюбу (летась гэты паказчык быў роўны 6,2). А вось колькасць разводаў павялічылася. Так, у студзені-красавіку 2012 года скасаваны амаль 13,3 тыс. шлюбаў — разводаў стала больш на 7,7 працэнта ў параўнанні са студзенем-красавіком 2011 года.

Закупляемыя для новых станцый метро саставы абсталяваны вагоннымі сістэмамі відэаназірання, паведаміў генеральны дырэктар транспартнага камунальнага ўнітарнага прадпрыемства "Мінсктранс" Лявонцій Папянок.

Бюджэт чэмпіянату свету па хакеі, які пройдзе 9-25 мая 2014 года ў Мінску, складзе амаль 12 млн еўра.