ХРОНІКА АПОШНІХ ПАДЗЕЙ

Еўразона пазбегла паўторнай рэцэсіі дзякуючы эканоміцы ФРГ

Аб'ём ВУП 17 дзяржаў еўразоны не змяніўся ў першым квартале 2012 года як у параўнанні з папярэднімі трыма месяцамі, так і адносна студзеня-сакавіка 2011 года, сведчаць папярэднія звесткі Статыстычнага ўпраўлення Еўрасаюза. Разам з тым, аналітыкі, апытаныя агенцтвам Blооmbеrg, чакалі зніжэння абодвух паказчыкаў на 0,2%. Такім чынам, еўразоне ўдалося пазбегнуць паўторнай рэцэсіі дзякуючы ўздыму эканомікі Германіі.

Франсуа Аланд — новы прэзідэнт Францыі

Франсуа Аланд, які перамог на выбарах, учора падпісаў акт аб уступленні на пасаду прэзідэнта, атрымаўшы перад гэтым паўнамоцтвы кіраўніка дзяржавы ад свайго папярэдніка Нікаля Сарказі. Таксама паміж двума былымі супернікамі адбылася гутарка, падчас якой экс-прэзідэнт у тым ліку паведаміў свайму пераемніку ядзерныя коды.

Краіны НАТА пераходзяць на вузкую спецыялізацыю

На саміце НАТА ў Чыкага кіраўніцтва альянсу афіцыйна аб'явіць аб запуску маштабнай рэформы сваіх узброеных сіл. Мяркуецца, што з гэтага часу краіны-ўдзельніцы будуць спецыялізавацца па адным або некалькіх кірунках: хтосьці зоймецца хімічнай абаронай, камусьці прыйдзецца сфакусавацца на забеспячэнні ГЗМ або абслугоўванні агульнага авіяпарку. За рэформай хаваецца не толькі неабходнасць эканоміць сродкі, запэўніваюць прадстаўнікі альянсу. Эксперты, зрэшты, сумняваюцца ў поспеху рэформы. Аб планаваным запуску пакета рэформаў пад агульнай назвай "Разумная абарона" паведаміў у канцы красавіка генеральны сакратар НАТА Андэрс Фог Расмусэн. "Нават вялікія краіны разумеюць, што падтрымліваць поўны набор сіл і сродкаў немагчыма, не кажучы ўжо пра малыя", — растлумачыў прадстаўнік штаб-кватэры НАТА. У Чыкага будзе абвешчана аб запуску 25 такіх праектаў, распрацаваных па прынцыпе "аб'яднання і сумеснага выкарыстання".

Чалавецтва за 40 гадоў знішчыла амаль трэць біярэсурсаў Зямлі

Біялагічныя рэсурсы на Зямлі скараціліся на 28% з 1970 па 2008 год, гаворыцца ў апублікаванай сёння новай справаздачы пад назвай "Жывая планета", якую раз у два гады складаюць спецыялісты Сусветнага фонду дзікай прыроды (WWF).

Да высновы аб памяншэнні параметраў біяразнастайнасці амаль на траціну спецыялісты фонду прыйшлі, у прыватнасці, на аснове вывучэння развіцця больш чым 9000 папуляцый прадстаўнікоў класаў пазваночных жывёл — млекакормячых, рыб, птушак, паўзуноў і амфібій.

Эксперты фонду канстатуюць, што спажыванне чалавекам прыродных рэсурсаў у параўнанні з 1966 годам падвоілася. Паводле іх слоў, галоўным карыстальнікам і забруджвальнікам сусветнай экасістэмы з'яўляюцца ЗША. "Калі б увесь свет выкарыстоўваў прыродныя рэсурсы ў такіх маштабах, у якіх іх сёння выкарыстоўваюць амерыканцы, то для падтрымання экабалансу запатрабавалася б пяць планет, супастаўных з Зямлёй", — адзначаецца ў справаздачы.

Аднак ЗША займаюць толькі пяты радок у спісе краін, якія марнатраўна выкарыстоўваюць сусветныя прыродныя рэсурсы ў разліку на душу насельніцтва. Лідарамі па гэтым паказчыку з'яўляюцца Катар (1-е месца), Кувейт (2), Аб'яднаныя Арабскія Эміраты (3) і Данія (4).