Магілёўцы шукаюць таннае малако праз Дзяржкантроль

Група гараджан напісала скаргі ў Дзяржкантроль на “Бабушкіну крынку”. Паводле іх, прадпрыемства вінаватае ў тым, што не пастаўляе танную прадукцыю ў крамы.

Грамадскі актывіст Аляксей Паўлоўскі заяўляе, што ў крамах немагчыма знайсці таннае малако тлустасцю 1%, 1,5% і 3%, тварог тлустасцю 9%, а таксама абястлушчаны кефір.

Раней у мясцовай прэсе дырэктар прадпрыемства Ігар Кананчук адзначаў, што таннага малака ў крамах няма, бо на яго не даюць заяўкі крамы. Аляксей Паўлоўскі атрымаў копіі чатырох заявак з крамаў. З іх відаць, што прадукцыю ў крамы не давозіць “Бабушкіна крынка”. На адной з заявак напісана, што 12 скрынак тварагу тлустасцю 9% былі прададзеныя за 40 хвілінаў.





Магілёўцы ў сваёй заяве просяць вярнуць танную прадукцыю на ўнутраныя рынкі, а вінаватых за недавоз яе ў крамы — адхіліць ад займаемых пасадаў.