Хрысціянскія дэмакраты нагадалі мінчанам звычайныя беларускія словы (фота)

21 лютага маладыя хрысціянскія дэмакраты павіншавалі мінчан з Днём роднай мовы.

Як паведаміла БелаПАН прэс-служба БХД, з самай раніцы моладзь расклеіла на інфармацыйных слупах уздоўж ліній метро «святочныя плакаты» са звычайнымі беларускімі словамі.

«На плакатах мы напісалі самыя простыя і звыклыя словы для сучаснага носьбіта беларускай мовы, — паведаміў актывіст Зміцер Трафімчук. — Агулам выйшла 16 слоў на адзін слуп. Нашы «слоўнікі» было добра відаць, і ранішнія прахожыя з цікавасцю разглядалі, што там напісана. Галоўная задача нашай акцыі — нагадаць грамадству пра складаны стан мовы. Толькі нешматлікія нашы суразмоўцы ведалі, што 21 лютага — Міжнародны дзень роднай мовы. Спадзяемся, што беларусы ўспомнілі лёгка забытыя словы і абавязкова будуць выкарыстоўваць іх ва ўжытку».