У Віцебску прыгажуня будзе раздаваць шчанюкоў ды кацянят

Маша Вялічка, якая у 2010 годзе перамагла ў конкурсе “Міс СНД-2010”, пашукае гаспадароў для беспрытульных жывёлаў.

Акцыя запланаваная на суботу, 11 лютага. Абаронцы жывёлаў вырашылі, што атрымаць чацвяраногага сябра з рук тытулаванай прыгажуні віцебчукам будзе асабліва прыемна. Каб узяць сабе жывёліну, трэба прыйсці з 11-й да 15-й гадзіны да абласнога цэнтра дзяцей і моладзі з пашпартам.

Дарэчы, Машу Вялічка прыцягнулі да ўдзелу ў акцыі не проста за прыгожыя вочы — дзяўчына вучыцца ў ветэрынарнай акадэміі, таму для яе такая дабрачыннасць — частка будучай прафесіі.