На брэсцкай біржы працы дырэктарам абяцаюць аклады, як дворнікам

Гэтак жа невысока цэняць загадчыкаў ды іншых начальнікаў.

Дворнікі патрабуюцца ў камунгас і навучальныя ўстановы. Самы папулярны аклад - мільён рублёў. Столькі ж прапануюць таму, хто зойме вакансію дырэктара спартовага клуба ў Брэсцкім універсітэце імя Пушкіна. Дырэктару камерцыйнай фірмы перападзе крыху больш - ад 1 мільёна 200 тысяч, але трэба мець аўтамабіль.

На так ж мільён, як дворніка, можа прэтэндаваць загадчык вытворчай часткі ўніверсітэта імя Пушкіна. Каля мільёна двухсот тысяч пакладзе ў кішэню загадчык аддзялення гарадской лякарні.

Начальнікам дадуць яшчэ менш. Напрыклад, у вайсковую часць патрэбныя пяць начальнікаў радыёстанцыі - чатыры аклады па 780 тысяч рублёў і адзін 970 тысяч. Мільён і крыху больш абяцаюць двум начальнікам тэхнічных Цэнтраў камерцыйных структураў, але ім трэба мець адмысловыя веды і стаж працы.

Ёсць і яшчэ ніжэйшыя заробкі. Прыкладам, настаўніку пачатковых класаў прапануюць 800 тысячаў. А ў абласную лякарню трэба 45 медыцынскіх сясцёр з акладам 600 тысяч рублёў.