ХРОНІКА АПОШНІХ ПАДЗЕЙ

Названая магчымая дата "непазбежнага дэфолту" Грэцыі

Захады, якія прымаюцца Грэцыяй па стабілізацыі бюджэту і дзярждоўгу, наўрад ці дадуць жаданыя вынікі, бо краіна ўжо неплацежаздольная і ў хуткім часе абвесціць аб дэфолце, заявіў у інтэрв'ю агенцтву Blооmbеrg кіруючы дырэктар агенцтва Fіtсh Эдвард Паркер. Грэцыя не зможа выканаць абавязацельствы па пагашэнні запазычанасці 20 сакавіка, калі ёй трэба будзе выплаціць каля 14,4 млрд еўра. Пагадненне Грэцыі з прыватнымі крэдыторамі аб спісанні часткі дзярждоўгу будзе разглядацца агенцтвам як падзея дэфолту, сцвярджае эксперт. Паводле яго слоў, дэфолт Грэцыі не стане сюрпрызам для рынкаў. "Еўрапейскі крызіс не мае гатовага рашэння. Крызіс у Еўропе будзе доўгім, зацяжным", — лічыць Эдвард Паркер.

Версію аб амерыканцах, якія загубілі "Фобас", правераць эксперыментальна

Расійскія спецыялісты правераць версію аб магчымым ненаўмысным уздзеянні выпраменьвання радараў ЗША на міжпланетную станцыю "Фобас-Грунт", якая ў лістападзе мінулага года не змагла выйсці на траекторыю пералёту да Марса, а ў нядзелю, 15 студзеня, звалілася на Зямлю ў акваторыі Ціхага акіяна. Чыноўнікі лічаць, што гэтая версія "мае права на жыццё". Эксперты ж называюць яе "экзатычнай". Эксперымент, які дазволіць пацвердзіць або абвергнуць версію аб магчымым уздзеянні радараў, будзе праведзены ў бліжэйшыя дні. Для гэтага блок з апаратурай, аналагічнай усталяванай на "Фобасе", будзе падвергнуты выпраменьванню сумарнай магутнасці магчымага ненаўмыснага ўздзеяння амерыканскіх радараў, заявіў кіраўнік міжведамаснай камісіі па аналізе палёту станцыі, экс-кіраўнік "Рас-авіякосмасу" Юрый Копцеў. Нагадаем, версію аб дачыненні амерыканцаў да страты расійскай станцыі ў аўторак агучыла газета "Коммерсант" са спасылкай на ўласную крыніцу ў ракетна-касмічнай галіне.

Саудаўская Аравія ўзбударажыла свет, назваўшы цану на нафту, якая яе задаволіць

Саудаўская Аравія перагледзела ў бок павышэння — да 100 долараў — цэнавы парог барэля нафты, які адпавядае яе цяперашнім інтарэсам. Пра гэта паведамляе лонданская газета Thе Fіnаnсіаl Tіmеs.

Раней Эр-Рыяд лічыў мэтавай цаной барэля 70 долараў. Цяпер гэтая лічба павышана амаль на траціну. Выданне цытуе міністра нафты і мінеральных рэсурсаў Саудаўскай Аравіі Алі ан-Нуэймі, які ў інтэрв'ю амерыканскай тэлекампаніі СNN заявіў: "Мы спадзяёмся, што зможам стабілізаваць нафтавыя цэны і трымаць іх на адзнацы 100 долараў за барэль".

Міністр замежных спраў Ірана Алі Акбар Салехі ўжо назваў "недружалюбнымі" планы Саудаўскай Аравіі павялічыць здабычу нафты ў выпадку нафтавага эмбарга ў дачыненні да Тэгерана.

Улады Ірана заклікалі суседнія арабскія краіны не павялічваць аб'ём здабычы нафты, каб кампенсаваць адсутнасць іранскага чорнага золата пасля таго, як пачне дзейнічаць уведзенае Еўрасаюзам эмбарга на імпарт іранскай нафты, заявіў прадстаўнік Тэгерана ў АПЕК Мухамад аль-Хацібі, перадае Rеutеrs.

Сакрэтнае дасье па бяспецы Алімпійскіх гульняў 2012 года было згублена агентам у вагоне цягніка

Сакрэтнае дасье па бяспецы лонданскай Алімпіяды-2012, якое змяшчае дэталі планаў забеспячэння паліцыяй парадку ў перыяд гульняў і трэніровак перад імі, было згублена ў вагоне цягніка ў англійскім графстве Кент.

Папку з дакументамі, якія раскрываюць тактычныя асаблівасці працы паліцыі, забыўся ў транспарце супрацоўнік праваахоўных органаў. Пасажыр, які знайшоў яе, перадаў дасье газеце Thе Sun, якая апублікавала ў гэтай сувязі матэрыял пад загалоўкам "Алімпійская ганьба". На думку выдання, шакіруючы промах мог забяспечыць тэрарыстаў бясцэннай інфармацыяй.

Як удакладняе ІТАР-ТАСС, у папцы былі паперы, дзе падрабязна сфармуляваны мерапрыемствы па забеспячэнні бяспекі на алімпійскіх аб'ектах брытанскай сталіцы. Акрамя таго, там можна было знайсці і пратаколы пасяджэнняў на высокім узроўні, дзе абмяркоўваліся шляхі супрацьдзеяння тэрарыстычнай пагрозе. У дасье таксама змяшчаліся імёны і нумары мабільных тэлефонаў канстэбляў паліцыі і многія скаргі вартавых парадку на непаладкі ў працы рацыі.