ХРОНІКА АПОШНІХ ПАДЗЕЙ
Пячэрскі суд Кіева асудзіў былога прэм'ер-міністра Украіны Юлію Цімашэнку, прызнаную вінаватай у перавышэнні службовых паўнамоцтваў, на сем гадоў пазбаўлення волі, паведамляюць украінскія інфармагенцтвы. Суд забараніў Цімашэнцы на працягу трох гадоў займаць пасады на дзяржаўнай службе.
Акрамя таго, суддзя абвясціў, што суд задаволіў іск НАК "Нафтагаз Украіны", па якім экс-прэм'ер павінна пакрыць нанесены кампаніі ўрон ў суме каля 1,5 млрд грыўняў (каля 200 млн долараў).
Падчас абвяшчэння прысуду Юлія Цімашэнка з абурэннем адзначыла, што прысуд у дачыненні да яе — гэта "вяртанне Украіны ў 1937 год". Цімашэнка паабяцала звярнуцца для абскарджання вердыкта ў Еўрапейскі суд па правах чалавека. "Мы будзем змагацца і абараняць маё сумленнае імя ў Еўрапейскім судзе", — паабяцала Юлія Цімашэнка.
Становішча на вуліцах Кіева напалілася яшчэ да таго, як стала вядома, які менавіта тэрмін далі Цімашэнцы. Будынак суда атачылі як прыхільнікі экс-прэм'ера, так і яе супернікі. Тут і там сталі ўспыхваць дробныя бойкі з міліцыяй, з'явіліся першыя затрыманыя. Сваё адмысловае меркаванне ў сувязі з працэсам выказалі і вядомыя ўкраінскія феміністкі: яны распрануліся па пояс і заявілі, што ніякай розніцы паміж Цімашэнкай і яе галоўным апанентам — прэзідэнтам Віктарам Януковічам — няма.
Паабапал Хрышчаціка стаялі падвоеныя кардоны сіл правапарадку, міліцыянеры таксама дзяжурылі ў аўтобусах. Усяго правапарадак забяспечвала каля тысячы міліцыянераў. Колькасць мітынгуючых, паводле інфармацыі прэс-службе БЮЦ, склала каля 10 тысяч чалавек.
ЦВК Польшчы пацвердзіла перамогу партыі прэм'ер-міністраПольская цэнтральная выбарчая камісія 11 кастрычніка апублікавала канчатковыя вынікі парламенцкіх выбараў, якія адбыліся двума днямі раней. Як паведамляецца на сайце ЦВК, першае месца, як і меркавалася, дасталася партыі прэм'ера Дональда Туска "Грамадзянская платформа", якая набрала 39,18 адсотка галасоў.
За "Закон і справядлівасць" яго асноўнага апанента Яраслава Качыньскага прагаласавалі 29,89 адсотка выбаршчыкаў. Трэцяе месца заняў "Рух падтрымкі Палікота", які атрымаў 10,02 адсотка галасоў.
Па выніках выбараў назіральнікі яшчэ напярэдадні зрабілі выснову, што прэм'ерам Польшчы хутчэй за ўсё застанецца Дональд Туск. Акрамя таго, не выключана, што не зменіцца і склад кіруючай кааліцыі. "Грамадзянская платформа" стала першай партыяй у гісторыі Польшчы, якой удалося два разы запар выйграць парламенцкія выбары.
Эксперты: вітамінныя дабаўкі скарачаюць жыццёБольшасці людзей не трэба прымаць штучныя вітаміны. Як паказала апошняе даследаванне Універсітэта Усходняй Фінляндыі і Універсітэта Мінесоты, часта гэта лішняе, а часам нават можа прывесці да ранняй смерці ў пажылых жанчын, паведамляе ABC News. Асабліва экспертаў хвалююць дабаўкі з жалезам. А вось кальцый, наадварот, змяншаў рызыку смерці. Павялічвалі рызыку смерці і мультывітаміны, вітамін В 6, фоліевая кіслата, магній, цынк, медзь.
Такую выснову эксперты зрабілі на падставе звестак, атрыманых падчас Даследавання стану здароўя жыхарак Аёвы. У рамках даследавання 38772 жанчыны, чый сярэдні ўзрост складаў 62 гады, запаўнялі апытальнікі. Анкеты закліканы былі распавесці, якія дабаўкі прымалі жанчыны ў 1986, 1997 і 2004 гадах.
Аказалася, да 2004 года колькасць жанчын, якія прымалі дабаўкі, павялічылася з 66% да 85%. Прытым гэтыя людзі нярэдка трэніраваліся, елі здаровую ежу і не палілі. Праўда, у выніку яны паміралі раней, чым іх аднагодкі, якія не прымалі дабаўкі. Якім менавіта чынам дабаўкі павялічвалі верагоднасць смерці, навукоўцы пакуль не ведаюць. У любым выпадку, яны рэкамендуюць адысці ад правіла "чым больш, тым лепш", выкарыстоўваючы дабаўкі ў якасці прэвентыўных мер. Тое ж самае можна сказаць і пра антыаксіданты накшталт вітамінаў А, Е, бэта-караціну.