Zамор'е
Афтальмолаг Чандрашэкхар Чаван, натхнёны выглядам дыяментаў на зубах жонкі, стварыў каштоўныя кантактныя лінзы, здольныя запаліць асаблівы агеньчык у жаночых вачах. Акрамя жонкі, на стварэнне эксклюзіўных кантактных лінзаў яго падштурхнуў павышаны попыт на вырабы з дыяментамі, ад аправы для акуляраў і да наручных гадзіннікаў.
Афтальмолаг выкарыстаў склеральныя лінзы Bоstоn Sсlеrаl, каб каштоўнасці не дакраналіся да рагавіцы. Прастора паміж лінзай і паверхняй вока запоўнена штучнай слязой, што робіць модны аксесуар бяспечным для здароўя. Чаван прызнаецца, што яго вынаходства атрымала змяшаныя водгукі пакупнікоў. Некаторыя лічаць, што выгляд новых лінзаў палохае, але большасць упэўненыя, што пазалочаныя кантактныя лінзы з дыяментамі стануць адным з самых модных аксесуараў у Балівудзе. Афтальмолаг лічыць, што каштоўныя лінзы могуць стаць добрай альтэрнатывай традыцыйнаму пярсцёнку з дыяментам пры прапанове рукі і сэрца, а шчаслівае ззянне вачэй дзяўчыны будзе ўзмоцнена зіхаценнем дыяментаў так, што ніхто не зможа адвесці вачэй. Улічваючы кошт пары пазалочаных кантактных лінзаў з дыяментамі, які складае 15 000 долараў, можна будзе ўпэўнена сказаць, што падарунак зроблены па-сапраўднаму закаханым жаніхом. Прыбытак ад продажу пазалочаных кантактных лінзаў Чандрашэкхар Чаван плануе выдаткаваць на дабрачыннасць.
Дамы дарма мардуюць сябе жорсткімі дыетамі і пацеюць да сёмага поту на бегавых дарожках, каб стаць стройнымі, як фотамадэлі з вокладак часопісаў. Як паказваюць даследаванні, мужчыны аддаюць перавагу пышным формам.
Стандарты прыгажосці 60-х гадоў сёлета зноў становяцца актуальнымі, і таму жанчынам, якія пакутуюць ад неадпаведнасці параметраў сваёй постаці сучасным стандартам, псіхолагі з ЗША і Еўропы раяць расслабіцца. Нармальных здаровых мужчын прывабліваюць дамы ў целе, а зусім не хударляўкі, як гэта прынята лічыць. Ідэальная постаць з параметрамі 90-60-90 не з'яўляецца фаварытам сярод мужчын. Паводле даследаванняў, самымі прыгожымі суадносінамі аб'ёму стану да сцёгнаў мужчыны лічаць 0,7 — гэта значыць, талія 70 сантыметраў і сцёгны 100 сантыметраў або талія 80 сантыметраў і сцёгны 115 і г.д. Галоўнае — не аб'ём сам па сабе, а правільныя, прыгожыя прапорцыі. Большасць мужчын не пярэчаць, калі іх сяброўка набірае пару-тройку лішніх кілаграмаў, аднак выказваюць незадаволенасць, калі яна становіцца залішне худой на іх густ. Эксперты нагадваюць, што галоўнае ў адносінах паміж мужчынам і жанчынай — не фігура, а каханне і ўзаемная павага, а цела павінна быць не ідэальным, а здаровым і падцягнутым, што па сілах практычна кожнаму з нас.
У 2007 годзе дваццацігадовая швейцарка не змагла перасекчы мяжу з ЗША. Прычынай стала немагчымасць вызначэння яе асобы па адбітках пальцаў — скурны малюнак на кончыках пальцаў проста адсутнічаў. Дакументальна ўсё было чыста, выключалася і злачыннае мінулае маладой жанчыны.
Падчас расследаванняў высветлілася, што сярод членаў яе сям'і ў некаторых таксама адсутнічаў "біялагічны рэльеф". Даследчыкі зрабілі выснову: вінаватая Аdеrmаtоglурhіа, генетычная анамалія, якая ўяўляе сабой мутацыю адрэзка ДНК, які адказвае за фарміраванне папілярнага малюнка. Ключавым момантам у гэтым з'яўляецца бялок smаrсаd1, які падчас сінтэзу не кадзіруецца. Цікава таксама, што ў месцах адсутнасці рэльефу паніжаны і ўзровень потавыдзялення. Цяпер навукоўцы высвятляюць усе сакрэты бялку smаrсаd1 і яго ролю ў фармаванні скурнага малюнка на пальцах, далонях і ступнях.