Нашэсце бландзінак

Бландзінка і брунетка едуць у ліфце, які раптам спыняецца. Дзверы не адчыняюцца. Бландзінка пачынае крычаць:

— Ратуйце! Ратуйце!

Брунетка прапаноўвае:

— Давай будзем крычаць разам!

Бландзінка:

...Яны абагналі Чапаева і Шцірліца па колькасці складзеных пра іх анекдотаў. Яны любяць насіць кароткія спаднічкі, стукаць высокімі абцасамі і пастаянна ўсміхацца. Іх любяць у любой кампаніі і ніхто нават не думае на іх крыўдзіцца: яны ж бландзінкі! Нядаўна ў іх жыцці з'явілася сваё прафесійнае свята — Сусветны Дзень бландзінак, які па ўсім свеце адзначаюць 31 мая.

Бландзінкі "руляць"!.. ...у кабрыялетах, "Крайслерах", BMW Х6 і скутарах

Беларуская тусоўка вырашыла не заставацца ў баку і зладзіла ў гэты дзень спецыяльны "Парад бландзінак" (на фота). "Бялявыя" галовы нашай сталіцы ў гэты дзень раз'язджалі на кабрыялетах, "Крайслерах", BMW Х6 і нават скутарах. Каб трапіць у лік удзельніц парада, трэба было прайсці адмысловы кастынг. Галоўная ўмова — быць бландзінкай.

Гэта трэба было бачыць! Дзясяткі гламурных медсястрычак, багінь і герояў казачных мультфільмаў — пераапранутыя бландзінкі — здзіўлялі мінакоў і прымушалі яшчэ доўга глядзець сабе ўслед: яшчэ б — не кожны дзень пабачыш нашэсце бландзінак.

— Нас было сем камандаў плюс каманда зорак, — расказала "Звяздзе" абаяльная бландзінка Людміла Радкоўская. — Былі марскія бландзінкі, летнія, "бландзінкі ў ружовым", але самая лепшая каманда — "бландзінкі Бонда". Я таксама была ў іх ліку. Шыкоўны парад атрымаўся.

Старт картэжу з белакурымі прыгажунямі пачаўся ля Нацыянальнай бібліятэкі. Пазней на беразе Свіслачы бландзінкі раздавалі мінакам надзіманыя шары — як сімвал сябе: радасці і добрага настрою.

"Уключыць бландзінку"

Якая бландзінка не любіць патанчыць у клубе? Арганізатары ўлічылі і гэта: апоўначы дзяўчат прывезлі ў начны клуб, дзе для іх выступілі беларускія бландзінкі-"зоркі".

  — Гэта было шэдэўральна! — дзеліцца ўражаннямі са "Звяздой" пышнагрудая Саша Паўлава. — Усё прайшло вельмі весела, пазітыўна і з добрым настроем. Няхай некаторыя і думаюць, што мы тупенькія, але гэта не так: мы не памыляемся, мы проста ўдала ўваходзім у вобраз (<І>усміхаецца — аўт.). А ўвогуле, бландзінкі жывуць і ў мужчынах. Праўду кажу: "мужчыны-бландзінкі" ў Беларусі таксама ёсць, толькі яны маскіруюцца (смяецца — аўт.).

Гэтай восенню ў Мінску прайшоў конкурс "Міс грудзі", а вясной вось эстафету пераняў "парад бландзінак". Магчыма, ужо зусім хутка нешта падобнае зладзяць і хлопцы — "Містар мускулістая нага" або парад "голых торсаў". Дакладна — заўтра ж іду купляць абанемент у спартзалу! Усім бландзінкам, якія чытаюць "Звязду", — прывітанне!

Ілья ЛАПАТО.

Фота Марыны БЕГУНКОВАЙ.